Gutxienez 162 pertsona hil dira Birmanian, meategi batean izandako luizi batean

Birmaniako erreskate taldeek 162 pertsonaren gorpuak erreskatatu dituzte azken orduetan Katxin estatuan, Birmania iparraldean, meategi batean izandako luizi baten ostean, Birmaniako Informazio Ministerioak jakitera eman duenez. 

"304 metro baino gehiagoko muino altu bat erori da, inguruan lanean ari ziren beharginak lurperatuz", azaldu du herrialde horretako erreskate zerbitzuko kide batek, Birmaniako Gobernuak zabaldu duen ohar batean.

Tokiko agintariek ohartarazi dutenez, ehunka meatzari lurperatuta geratu dira montzoi garaiko euriteek eragindako luiziaren ondorioz. Luizia atzo, osteguna, jazo zen, 08:00ak aldera, Sate Mu herrian dagoen meategi batean, Hpakant eskualdean. 

Luizia gertatu denean, ehunka behargin zeuden meategian, eta horietako gehienak lurperatuta geratu direla uste dute agintariek, Poliziako agente batek Xinhua egunkariari azaldu dionez. Luiziak maiz gertatzen dira Katxin estatuan, bereziki Hpakant eskualdean. 

Herritar askok inguruko jade meategietan egiten dute lan, eta luizi gehienak hormak eta eustormak erortzean gertatzen dira. 2015eko azaroan, meategi batean lanean ari ziren 116 pertsona hil ziren, eskualde horretan izandako luizi batean.