Itxi

Mundua

Erresuma Batua

Johnsonek urriaren 15era arteko epea eman dio EBri Brexitari buruzko akordiorako

AGENTZIAK | ERREDAKZIOA

Epe horren ostean "onartu egin beharko litzateke (porrota) eta orrialdea pasatu", adierazi du lehen ministro britainiarrak.

  • Boris Johnson

    Boris Johnson. Irudia: EFE

Boris Johnson Erresuma Batuko lehen ministroak urriaren 15era arteko epea eman du Europar Batasunarekin (EB) Brexitari buruzko akordioa lortzeko. Epe horren ostean, "onartu egin beharko litzateke (porrota) eta orrialdea pasatu".

"Urriaren 15eko Europako Kontseiluaren aurretik akordio bat egon behar da Europako gure lagunekin, urtea amaitu baino lehen indarrean sartuko bada", adierazi du Erresuma Batuko gobernuburuak ohar baten bidez.

Johnsonen hitzak datorren asteartean Londresen Erresuma Batuaren eta EBren arteko elkarrizketen erronda berri bat hasi baino lehen datoz, merkataritza askeko itun berri bat ixteko, abenduaren 31n egungo harremanaren amaiera malkartsua gerta ez dadin.

David Frost negoziatzaile britainiarrak Mail on Sunday egunkariak argitaratutako elkarrizketa batean esan duenez, azken orduetan Erresuma Batuko Gobernuak mezu ugari zabaldu ditu, akordiorik ez lortzeko beldurrik ez duela adieraziz.

Lehen ministroaren ustez, "ez du zentzurik (urriaren 15etik) haratago doan epeetan pentsatzeak. Ordurako ados jartzen ez bagara, ez dut uste gure artean merkataritza libreko akordiorik egongo denik, eta onartu eta orria pasatu beharko genuke".

Desadostasun puntuez aritu da Johnson, aipatu gabe, estatu-laguntzak edo arrantza, esaterako, eta erantsi du Erresuma Batuak ez diela uko egingo "herrialde independentea izateak esan nahi duenaren oinarriei".

Exekutibo kontserbadoreak eskuak libre izan nahi ditu ekonomiarentzat funtsezkoak diren sektoreak Estatuko inbertsio masibo batekin babesten duen erabaki ahal izateko, hala nola teknologikoa (nahiz eta "torien" tradizio ez-interbentzionista izan), eta Bruselarekin egindako edozein konponketa laguntza horietarako oztopo posible gisa ikusten du.

Hala eta guztiz ere, negoziazioek porrot egitea bere herrialdearentzat "emaitza ona" izango litzatekeela berretsi zuen lehen ministroak, eta kasu horretan Europar Batasuna Erresuma Batuarentzat "Australia bezalako" bazkide komertzial izatera pasatzea esan nahiko lukeela, Munduko Merkataritza Erakundeak ezarritako protokoloekin.

Adierazpen horiek Financial Times egunkariak zabaldutako informazioari gehitu behar zaizkio; izan ere, Erresuma Batuko Gobernuak Europar Batasunetik irteteko akordioaren zati batzuk bertan behera utziko lituzkeen legedi berri bat onartzeko asmoa du, batez ere estatuei eta aduanei dagokiena.

Egunkariaren iritziz, barne merkatuaren lege berri hori onartzeak (asteazkenerako espero da) negoziazioak aste honetan bertan lehertzea eragin lezake.

Barnieren hitzetan, Erresuma Batuarekin negoziatzea oso zaila da eta zeharo kezkatuta dago

Michel Barnier, Europar Batasunaren "brexit"erako negoziatzailea kezkatuta agertu da, astelehen honetan, Erresuma Batuarekin duen harremanaren inguruan, herrialde horrek "bi munduetako onena nahi duela" aitortu baitu.

"Negoziazioak merkataritza, segurtasuna, garraioa, energia eta beste hainbat gai jorratzen ditu. Zeharo kezkatuta nago. Irailaren bukaeran eta urrian berriz elkartuko gara, baina negoziazio oso zaila izaten ari da, britainiarrek bi munduetako onena nahi baitute", azaldu du Barnierek. 

"France Inter" irrati-etxeak egindako elkarrizketa batean aipatu zuenez, Erresuma Batuaren eta Europar Batasunaren arteko banaketa britainiarrek hartutako erabakiaren ondorioz izan zen, eta pena handiz, baina errespetatu egiten du. Gauzak horrela, bien arteko harremana nolakoa izango den ezartzen jarraitu nahi du.

Negoziazioen zortzigarren hitzordua egingo da, astearte honetan, merkataritza libreko hitzarmen berri bat adoste aldera, abenduaren 31 baino lehen egun indarrean dagoen harremana eten ez dadin.

  • Bisitatuena

      Kargatzen ikusiena
      Kargatzen ikusiena