Boko Haramek bere gain hartu du Nigeriako 300 ikasle baino gehiagoren bahiketa

Boko Haram talde terroristak bere gain hartu du Kankarako institutu batean (Katsina estatua, Nigeria iparraldea) 300 ikasle baino gehiago bahitu izana, baina oraindik ez du jakinarazi zer eskatzen duen haiek askatzea onartzeko.

Ahmed Salkida Boko Haramen adituak zuzentzen duen HumAngle Nigeriako albiste atariak jakitera eman duenez, Abubakar Shekau talde terroristako buruak bideo bat zabaldu du astearte goizaldean Katsinako ikasleen bahiketa bere gain hartuz.

"Katsinan gertatu dena islama sustatzeko egin da, eta islamiarrak ez diren mendebaldeko hezkuntzan egiten diren ekintzak ezabatzeko, hori ez baita Alak eta bere profeta sakratuak baimendutako hezkuntza mota", esan du Boko Harameko buruzagiak.

"Alak eta bere profeta sakratuak agindu zutena ez da irakasten ari. Horren ordez, islama suntsitzen ari dira. Sotila izan daiteke, baina Alak, zeru eta lurraren jainkoak, ezkutuan dagoen guztia ezagutzen du. Alak islama sustatzea eta gu musulman gisa hiltzea nahi du", azpimarratu du Shekauk bere mezuan. "Gu gaude Katsinan gertatu denaren atzean ", esan du, Boko Harameko buruzagia dela berretsiz.

Kankarako bigarren hezkuntzako institutuan 300 haur baino gehiagoren bahiketa, Boko Haramek Nigeriako ipar-mendebaldean sekula egin duen operaziorik handiena da; izan ere, orain arte bere ekintzak segurtasun indarren aurkako segadetara eta eskala txikiko bahiketetara mugatu izan dira, erreskateak ordaintzearen truke.

Boko Harameko iturri batek HumAngleri baieztatu dionez, talde terroristak oraindik ez du ikasleak askatzeko eskakizunik iragarri. Aminu Masari Katsina estatuko gobernadoreak Muhamadu Buhari Nigeriako presidentearekin astelehenean egindako bileran esan zuenez, Boko Haramek bahitutako mutilen familiei bere eskakizunak egin zizkien.

Boko Haramek 2014an Chibokeko ikastetxe bateko 276 neska bahitu zituen, Bornoko estatuan; horietatik 112 oraindik ez dakite non dauden, eta 164 askatu egin dituzte.