Mundua -
Koronabirusa
Alemaniak otsailaren 14ra arte luzatuko du konfinamendua
Indarrean dauden neurriak mantenduko dituzte eta musukoaren erabilera derrigorrezkoa izango da garraio publikoan; gainera, azken orduetan 1.000 pertsona hil dira.
eitb media
Alemaniako Gobernuak otsailaren 14ra arte luzatuko du konfinamendua, azken orduetan 1.000 hildako zenbatu ostean. Erabakia estatu federatuetako gobernuekin adostu du Gobernuak.
Hasiera batean urtarrilaren amaieraraino indarrean egon behar zuen konfinamenduak ez ditu aldatuko gaur egun indarrean dauden murrizketak: jatetxeak, aisialdirako instalazioak eta funtsezkoak ez diren produktuak saltzen dituzten dendak ixteko agindua, esaterako.
Gainera, musukoaren erabilera nahitaezkoa izango da garraio publikoan, eta telelanean ere erabiltzea sustatuko dute. Die Welt egunkari alemanak jakitera eman duenez, Alemaniako Lan Ministerioak dekretu batean zehaztuko ditu adostutako neurri guztiak.
Datu kezkagarriak
Datuek erakusten dutenez, Europako herrialde kaltetuenetakoa da Alemania.
Gaixotasun infekziosoak kontrolatzeaz arduratzen den Robert Koch institutuak bildutako datuen arabera, 1.000 pertsona hil dira azken 24 orduetan Alemanian, asteburuan izandako kutsatzeen gorakadaren ondorioz.
Halaber, 2 milioi pertsona baino gehiago kutsatu eta 48.997 hil dira Alemanian pandemia hasi zenetik.