Mundua -
JERUSALEM
29 adin txikiko zauritu eta beste zortzi atxilotu dituzte Jerusalemen
Nazio Batuen Erakundea (NBE), bere aldetik, kezkatuta agertu da "okupatutako Jerusalem Ekialdeko indarkeriarekin", eta "eraispenak eta etxegabetzeak" bertan behera uztea eskatu dio Israeli.
EITB MEDIA | AGENTZIAK
UNICEF Haurren Laguntzarako Nazio Batuen Funtsak igande honetan salatu duenez, 29 haur palestinar zauritu dira Israelgo Poliziarekin Jerusalem Ekialdean izandako istiluetan. Halaber, beste zortzi adin txikiko atxilotu dituzte. Salaketaz harago, haurren aurka indarkeriarik ez erabiltzeko eta atxilotutako adingabeak askatzeko eskatu die Israelgo agintariei.
Zaurituen artean urtebeteko haur bat dago, UNICEFek zabaldutako datuen arabera. Gainera, beste haur batzuk ospitaleratu behar izan dituzte, buruan eta bizkarrezurrean zituzten zauriengatik.
Gainera, UNICEFek salatu duenez, anbulantziak ezin izan dira protestak gertatu diren gunera sartu zaurituak ebakuatzera.
Ildo horretan, "haurren aurkako indarkeria erabiltzeari uko egiteko eta atxilotutako haurrak askatzeko" eskatu die UNICEFek Israelgo agintariei. "Haurrak atxilotzea azken errekurtsoa izan behar da eta ahalik eta denbora laburrenean erabili", gaineratu du.
Bestalde, Jerusalemen ez ezik, indarkeriak Gazako zerrendan, Zisjordanian eta Israel hegoaldean ere gora egin duela salatu du erakundeak.
Etxegabetzeak bertan behera uzteko eskatu dio NBEk Israeli
Antonio Guterres NBEko idazkari nagusiak "kezka handia" agertu du okupatutako Jerusalem Ekialdeko "etengabeko indarkeriagatik" eta Israelek familia palestinarrak Sheij Jarrah eta Silwan auzoetan dituzten etxeetatik ateratzeko duen asmoagatik.
Testuinguru horretan, nazioarteko zuzenbideari jarraituz, "eraispenak eta etxegabetzeak" bertan behera uzteko eskatu dio ohar bidez Israeli.
Ameriketako Estatu Batuak, kezkatuta etxegabetzeengatik
Jake Sullivan AEBko presidentearen segurtasun aholkulariak Israelgo bere homologoarekin hitz egin du bart telefonoz, Jerusalemengo egoeragatik Ameriketako Estatu Batuen kezka adierazteko.
AEBko Gobernua kezkatuta agertu da Sheij Jarrah auzoan familia palestinarrak beren etxeetatik atera ditzaketelako. Aitzitik, Gazatik Israelera koheteak jaurti dituztela salatu du: "Ez da onargarria eta gaitzetsi egin behar da".