Mundua -
UKRAINA
Errusiak idatziz erantzun dio Ukrainako krisiaren inguruan AEBk bidalitako gutunari
Estatu Batuek ez dute eskutitzaren edukiaren inguruko xehetasunik eman nahi izan. Dena dela, Antony Blinken AEBko Estatu idazkariak eta Sergei Lavrov Errusiako Atzerri ministroak telefonoz hitz egingo dute astearte honetan.
AGENTZIAK | EITB MEDIA
Errusiak azken ordutan erantzun dio Ameriketako Estatu Batuek (AEB) Ukrainako krisiaren inguruan igorritako gutunari. AEBko Estatu Idazkaritzako bozeramaile batek astelehen honetan baieztatu duenez, Errusiak idatziz erantzun die AEBren proposamenei. Hala ere, ez du horren edukiari inguruko xehetasunik eman.
"Ez litzateke eraginkorra izango jendaurrean negoziatzea; beraz, nahi izanez gero, Errusiak hitz egin dezala bere erantzunaz", gehitu du bozeramaileak.
Antony Blinken AEBko Estatu idazkariak eta Sergei Lavrov Errusiako Atzerri ministroak telefonoz hitz egingo dute astearte honetan.
Iragan astean, AEBk eta NATOk idatziz erantzun zieten Ukrainako krisia baretzeko Errusiak egindako eskariei. Hiru dira Errusiaren eskakizun nagusiak: NATOren zabalkundea geldiaraztea eta Ukraina eta Georgia kide gisa ez onartzea, sobietar errepublika ohiekin kooperazio militarra etetea eta NATOk militarrak erretiratzea 1997ko posizioetara.
