Xi Jinpingek boterea indartuko du Txinarentzat garrantzitsua den unean

Txinak barne politikako ekitaldi handiena du igande honetan: Alderdi Komunistaren 20. Kongresu Nazionala. Hitzordu historikoa da, Gobernuaren agintaritzan aldaketak ekarriko dituena eta Xi Jinping presidentearen hirugarren agintaldia berretsiko duena.

Xi Jinping azken hamarkadetako buruzagi txinatar boteretsuenak emango dio hasiera Kongresuari, Txinarentzat oso garrantzitsua den une batean, koronabirusaren aurkako osasun estrategia zorrotzarekin eta Errusiarekiko duen jarrerak Mendebaldetik urrundu duenean.

Alderdiko agintari nagusien babesa izanda, Xik agintaldi berri bat hasiko duela aurreikusten da, eta ez duela oinordekorik izendatuko, aurreko agintariek hamarkada bateko agintaldia egin ostean egin duten moduan.

Kongresu Nazionalak datozen bost urteetarako politikaren norabidea ezarriko du, gizarte, ekonomia eta kultur arloetan, eta bost urtean behin egiten den astebeteko batzarra da.

Normalean, urrian edo azaroan egiten da, eta alderdikideek aukeratutako eta herrialdeko txoko guztietatik iritsitako 2.300 ordezkari biltzen ditu. Laurdena dira emakumezkoak, eta % 11 inguru gutxiengo etnikoetako ordezkariak dira.

Xik alderdiaren idazkari nagusi izaten jarraituko duela aurreikusten den arren, praktikan ez du hirugarren agintaldia martxora arte abiatuko, orduan izendatuko baitute ofizialki estatuburu.

Aurtengo Kongresuak berezitasun bat izango du, Li Keqiang lehen ministroaren etorkizunaz erabakiko baitute, dagoeneko iragarri baitu erretiroa hartuko duela; baina honek ere martxora arte itxaron beharko du kargua behin betiko uzteko.

Hala ere, espekulatzen hasiak dira nor izan daitekeen bere ordezkoa, eta Wang Yang Txinako Herri Politikaren Kontsulta Konferentziaren Batzorde Nazionaleko presidentea eta Hu Chunhua lehen ministro ordea dira hautagai nagusiak.