Mundua -
Benedikto XVI.aren heriotza
65.000 pertsona inguruk agur esan diote Benedikto XVI.ari beila ofizialaren lehen egunean
Ostegunean hileta elizkizuna egingo dute San Petri plazan, Frantzisko aita santuak gidatuta. Bi milioi pertsona baino gehiago joan ziren Joan Paulo II.ari agur esatera, 2005ean hil ondoren.
Agentziak | EITB Media
65.000 pertsona inguru sartu dira Vatikanoko San Petri basilikan Benedikto XVI.ari azken agurra emateko. Haren gorpuzkiak Gian Lorenzo Bernini italiarrak egindako baldakino monumentuaren aurrean daude. Bi milioi pertsona baino gehiago joan ziren Joan Paulo II.ari agur esatera, 2005ean hil ondoren.
Goizetik milaka fededunek, asko eta asko Alemaniako banderekin, ilara egin dute Vatikanoan Benedikto XVI.a aita santuari azken agurra emateko. Aita santu emeritua larunbatean hil zen, eta horren gorpuzkiak goizaldean eraman dituzte San Petri basilikako kapera batera, eliztarrek publikoki agur esateko aukera izan dezaten. Hiru egunez izango da bertan.
Ostegunean, hileta elizkizuna egingo dute San Petri plazan.
Zendu zenetik, Vatikanoko lorategien barruan dagoen monastegi bateko kapera pribatu batean izan dituzte Benedikto XVI.aren gorpuzkiak. Bertara hurbildu ziren atzo lagun minak, senitartekoak, eta elizgizon eta apaizak.
Gaurtik aurrera, baina, herritarrek eman ahalko diote euren agurra.
Vatikanoak atzo zabaldutako irudietan ikus daitekeenez, beluz gorriz estalitako katafalkoaren eta kuxinen gainean paratu dute gorpua. Buruan apaindutako mitra zuri bat du eta esku artean, arrosarioa.
