Mundua -
Goi-bilera Indian
G20ko Finantza ministroek ez dute Ukrainaren inguruko akordiorik erdietsi
Herrialde gehienek, Txina eta Errusia salbu, Ukrainako inbasioa gaitzetsi dute, eta gatazka horri egotzi diote inflazioa hazi, banaketa-kateak eten eta janari eta energia alorrean segurtasun falta egon izana.
AGENTZIAK | EITB MEDIA
G20ko Finantza ministroek kale egin dute larunbat honetan Indiako Bangalore hirian egiten ari diren goi-bileran, eta ez dute Ukrainako gerrari eta nazioarteko ekonomiaren gaineko eragin ezegonkortzaileari buruzko akordiorik lortu. Ukrainako inbasioaren lehenengo urteurrenarekin bat egin du G20ko bilera horrek.
Indonesian iaz izandako goi-bileran adostu zuten bezala, kide gehienek "irmo" gaitzetsi dute Ukrainako gerra, eta horrek nazioarteko ekonomian izandako eragina, Finantza ministroen bileren ostean zabaldutako laburpenen arabera.
Ostiralaz geroztik Indiako Bangalore hirian bilduta daude G20ko Finantza ministroak, Ukrainako inbasioaren eta zorraren kontrolaren inguruko jarrera bateratua adostu nahian.
Herrialde gehienek, Txina eta Errusia salbu (beste bi herrialderekin batera, bileran modu presentzialean egon ez ziren biak), Ukrainako inbasioa gaitzetsi dute, eta gatazka horri egotzi diote inflazioa hazi, banaketa-kateak eten eta janari eta energia alorrean segurtasun falta egon izana.