Mundua -
Ukrainako gerra
Errusiak Ukrainako hainbat gune, Kiev tartean, bonbardatu ditu azpiegituren kontra egindako aire eraso batean
Hiriburuko alkateak baieztatu du bi pertsona erietxeratu behar izan dituztela bi barrutitan izandako leherketen ondorioz. Horrez gain, erasoak izan dira Kharkiven, Odesan eta Mykolaiven. Zaporizhiako zentrala argindarrik gabe dago, eta diesel sorgailuen bidez ari dira elikatzen.
Agentziak | EITB Media
Errusiak Ukrainako hainbat gune, Kiev hiriburua tartean, bonbardatu ditu bart azpiegituren kontrako egindako beste aire eraso batean. Leherketak egon Kharkiven, Odesan eta Mykolaiven, eta hiriburuko Holosiiv eta Sviatoshin barrutietan. Gainera, herrialdearen hegoaldeko energia azpiegiturak ere jomugan izan ditu Errusiak.
Vitali Klitschko Kieveko alkateak baieztatu duenez, bi pertsona erietxeratu dituzte bi barrutietan izandako eztandetan zauritu ostean. Sviatoshinen bi auto erre dira, misilek bizitegi gune bateko patio bat bete-betean harrapatu baitute.
"Aire alerta indarrean dago. Geratu zuon aterpeetan!", eskatu die Klitschkok herritarrei Telegramen partekatutako mezu batean.
Alkatearen esanetan, misilen jaurtiketaren eraginez, argindar etenak egin behar izan dituzte, eta "gutxi gorabehera, bezeroen % 15 argindarrik gabe daude".
Bestalde, Energoatom Ukrainako konpainia nuklearrak jakinarazi du Zaporizhiako zentrala energia gabe dagoela. "Okupazioa hasi zenetik seigarren aldiz, amatatuta dago estazioa. Bosgarren eta seigarren potentzia unitateak hozte fasean daude, eta 18 diesel sorgailu piztu dira hornidura bermatzeko", erantsi du.
Marksym Marchenko Odesako Administrazio Militarreko buruaren esanetan, eskualdeko hainbat azpiegitura energetikori eta bizitegi guneri eraso dio Errusiak.
"Zorionez, ez da biktimarik izan. Energia horniduran murrizketak daude. Defentsa antiaireko unitateek Errusiako misilak eraitsi dituzte. Lanean jarraitzen dugu, bigarren eraso bat espero dugu, beraz, herritarrei babeslekuetan geratzeko eskatu nahi diet", idatzi du Telegramen.
Kharkiv (Ukraina ekialdea) eskualdean eta izen bereko hirian 15 misil erori dira, Oleg Synegubov Eskualdeko Administrazio buruak zehaztu duenez.