Mundua -
Elkarrizketa
Sanchezek eta Bidenek Ukrainako gerra eta migrazioa izan dituzte hizpide Etxe Zurian
Bi agintariek Ukrainaren egoeraren eta migrazioaren arloko lankidetzaren inguruan aritu dira gaur, besteak beste. Txina eta Brasil Ukrainako gatazkan solaskide izatea defendatu du Sanchezek.
Agentziak | EITB MEDIA
Pedro Sanchez Espainiako Estatuko presidentea Joe Biden AEBetako presidentearekin bildu da ostiral honetan Etxe Zurian. Bileran, bi presidenteek Ukrainaz, defentsa arloko lankidetzaz eta migrazioaz hitz egin dute, besteak beste.
Errusiaren eta Ukrainaren arteko gerrak pisu handia izan du elkarrizketan, eta Sanchezek Txinaren eta Brasilen ikuspuntuak helarazi dizkio agintari estatubatuarrari. Era berean, NATOkoak ez diren nazioen ikuspuntuak entzutea proposatu du.
Sanchezek baldintzarik gabeko babesa adierazi dio Zelenski Ukrainako presidenteari, eta bere bake proposamena babestu du, Errusiak 2014an Krimea anexionatu aurreko status quo-an Ukrainako lurraldea berrezartzeko eskaerak jasotzen dituena, hain zuzen.
Bestalde, Bidenek eszeptizismoz erantzun dio Txinak proposatutako 12 puntuko bake planari, eta Beijingek subiranotasunaren errespetuari buruzko bere lehen puntuari buruz serio hitz egiten badu, Errusiari erretiratzeko eskatu beharko liokeela esan du.
Era berean, Luiz Inacio Lula da Silva Brasilgo presidenteak AEBen kritikak jaso ditu, Mendebaldea Ukraina armatzean gerra "sustatzen" aritu zela iradokitzeagatik.
Migrazioari dagokionez, Bidenek eskerrak eman dizkio Sanchezi, Espainiak Latinoamerikako pertsonentzako migrazio-bideak zabaltzeko konpromisoa hartu duelako.