Mundua -
Erresuma Batua
Charles III.a erregeak minbizia du
Erresuma Batuko erregeari minbizi mota bat diagnostikatu diote, baina ez dute zehaztu zein. Errege-etxeak azaldu duenez, urtarrilean aurkitu zioten tumorea. 75 urteko erregeak tratamendua hasi du gaur bertan, eta agerraldi publikoak bertan behera utziko ditu.
EITB Media
Charles III.a Erresuma Batuko erregeari zehaztu ez duten minbizi mota bat diagnostikatu diote, Buckingham Jauregiak astelehen honetan jakitera eman duenez.
Erresuma Batuko errege-etxeak ohar batean azaldu duenez, urtarrilean prostata-luzapen bat tratatzeko egin berri den ebakuntzan aurkitu zioten tumorea, baina BBC korporazio publikoak zehaztu du ez dela prostatako minbizia.
75 urteko erregeak "tratamenduen egutegia" hasi du gaur bertan, eta denbora tarte horretan agerraldi publikoak bertan behera utziko ditu, Buckinghamen arabera.
Charles III.ak eskerrak eman dizkio mediku taldeari, "azkar esku hartzeagatik". Buckinghamek azpimarratu duenez, erregeak "erabat positiboa izaten jarraitzen du jasotako tratuari buruz, eta bere funtzio publikoak lehenbailehen berriro betetzea espero du".
Errege-familiak nabarmendu duenez, Charles III.ak albiste hori ezagutzera ematea erabaki du zurrumurruak saihesteko eta minbiziari buruzko kontzientzia sortzen lagunduko duelakoan.
Charles III.a 2023ko maiatzaren hasieran igo zen tronura, hilabete batzuk lehenago bere ama, Elizabeth II.a erregina, hil ondoren, 70 urte baino gehiagoko erregealdiaren ostean.