Mundua -

Erresuma Batua

Keir Starmerrek "hiltzat" jo du 'Ruanda plana', Gobernuaren erronkak aurkeztu dituen agerraldian

Agindu bezala, berehala hasi da lanean Starmer, eta larunbat honetan egin du Downing Streeten (bere bulego eta egoitza ofiziala aurrerantzean) gobernuburu berri gisa lehen bilera, kabinete estreinatu berriarekin.

Rueda de prensa del nuevo primer ministro británico. EFE.
Rueda de prensa del nuevo primer ministro británico. EFE.
Rueda de prensa del nuevo primer ministro británico. EFE.

EITB Media

Whatsapp Facebook Twitter Telegram Email

Keir Starmer Erresuma Batuko lehen ministro laborista izendatu berriak larunbat honetan adierazi duenez, Gobernuak "politika berriak" jarriko ditu martxan, Erresuma Batuko hauteskunde orokorretan lortutako gehiengo argiaren babesarekin.

Agindu bezala, berehala hasi da lanean Starmer, eta larunbatean egin du Downing Streeten (bere bulego eta egoitza ofiziala aurrerantzean) gobernuburu berri gisa lehen bilera, kabinete estreinatu berriarekin.

Minuturik galdu gabe, atzo bertan osatu zuen taldea, aparteko ezustekorik gabe kideei dagokienez, lehen ministro gisa nazioaren aurrean lehen hitzaldia eman eta minutu gutxira, Charles III .a erregeak gobernua osatzeko enkargua eman ondoren.

Gaur emandako prentsaurrekoan, etorkizuneko erronkak eta gakoak argitu ditu. Migrazioari dagokionez, horren hitzetan, "hilda eta lurperatuta" dago aurreko gobernu kontserbadorearen immigrazio plan eztabaidagarria, Ruanda plana deiturikoa, Mantxako kanaletik Britainia Handira txalupa txikietan asiloa eskatzeko asmoz iristen diren migratzaileak Ruandara deportatzeko plana.

"Ruanda plana hilda eta lurperatuta zegoen martxan jarri aurretik ere. Inoiz ez da disuasio-elementua izan", esan du Starmerrek, "eta ez nago prest inor uxatzeko balio ez duten txingarrak bizitzen jarraitzeko", azpimarratu du. Bere aurrekoaren esanetan, Afrikako herrialdera deportatzeko plan horrek iritzia aldaraziko zien Britainia Handian batez ere Mantxako kanalaren ibilbide arriskutsuaren bidez sartu nahi duten ehunka migratzaileei. Starmerren esanetan, ikusi besterik ez dago urte hasieratik Erresuma Batuak jaso duen migratzaile kopurua, "errekorra lehen sei hilabeteetan".

Gainera, erronka fiskalei "zintzotasun osoz" aurre egingo diela agindu du Starmerrek, baina "erabaki zailak" hartu beharko dituela onartu du, "baita laster hartu ere".

Gobernu laborista baten "lehen egitekoa" hazkunde ekonomikoa bultzatzea dela adierazi du, eta hazkunde hori "herrialde osoan" gertatzen dela ziurtatuko duela.

Datorren asteartean, Starmer Washingtonera joango da NATOren goi-bileran parte hartzera, Erresuma Batuak Aliantzari ematen dion babesa argi uzteko. Ildo horretan, azpimarratu du segurtasuna eta defentsa izango direla Gobernuaren "lehen zeregina".

Era berean, Erresuma Batuak hartuko du Europako Erkidego Politikoaren hurrengo goi-bilera, uztailaren 18an.

Hau zure interesekoa bada, baliteke beste gai hauek ere izatea
Nazioartea Migrazioa Erresuma Batua Eguneko albisteak Albisteak