Alderdiak zatituta agertu dira berriro, ETAren amaieraren aurrean

PSEk, PPk eta UPyDk indarkeriaren amaierari buruz bat-egiteak apurtu izana leporatu die EAJri, EH Bilduri gerturatzea bilatzeagatik. Alderdi nazionalistak indarkeriaren amaiera ez dela "orrialdea pasatzea" izango esanez erantzun du.

Eusko Legebiltzarrak indarkeriaren amaierari buruzko kudeaketaren inguruan eztabaidatu du gaur, UPyDren mozioa dela eta. Ekimen horretan Jonan Fernandezek zuzentzen duen Eusko Jaurlaritzako Bake eta Bizikidetzako Idazkaritza Nagusia desegitea eskatzen zen, eta gero biktimen babesan ibilbidea izan duten pertsonek ordezkatzea. PPk trantsakzionatu du gero.

Azkenean, Ganberak ez du alderdiek aurkeztutako testu bat bera ere onartu, eta euren artean den zatiketa agerian utzi dute berriro. Bake eta Bizikidetza lantaldean EAJ eta EH Bildu bakarrik daude, baina ez dute bilerarik egiten.

PSE-EE, PP eta UPyD bat etorri dira EAJ eta Eusko Jaurlaritza EH Bilduri gerturatzen ari dela leporatzean, alderdi horri egiten dion eskaera-maila murrizten duela esatean, indarkeriaren amaieraren gaian akordiotara iristeko helburuarekin.

Akusazio horien aurrean, Joseba Egibar EAJren bozeramaileak Ganberan alderdiak eta lehendakariak duten konpromisoa nabarmendu du, ETAren indarkeriaren amaiera "ez dadin orrialdea pasatzea izan, azalpenik gabe, onespenik gabe, ezta gertutakoari buruzko kritika espliziturik gabe".

Egibarrek azaldu duenez, alderdia "indarkeria justifikatzen duen historia berriro ez idaztera" konprometitu da, eta terrorismoaren amaiera "errebantxan" ez bilakatzea espero duela gaineratu du.

Julen Arzuagak (EH Bildu) salatu duenez, PPren "indarkeriazko" politikek bakea "urruntzen" dute, eta Euskadin normalizazioan "gehiengo berriak sortu daitezkeela" azpimarratu du, alderdiak EAJrekin duen akordioaren harira.

Rodolfo Ares (PSE-EE) oso kritiko azaldu da Eusko Jaurlaritzaren politikarekin, eta aurreko legealdian baino adostasun gutxiago lortzea leporatu dio. Halaber, alderdiak "baloreak sakrifikatuz" ez duela adostasunekin bat egingo ohartarazi du.

Carmelo Barriok (PP) EAJk eta Eusko Jaurlaritzak aurreko pauso demokratikoak eman ez dituztenei "eskaerak" jaitsi izana deitoratu du, eta Bake eta Bizikidetza Idazkaritzako egungo lantaldea ordezkatzea eskatu du.

Gorka Maneirok (UPyD) ere Jonan Fernandezek zuzendutako taldea desegitea eskatu du, eta terrorismoaren amaiera egonkortzeko Eusko Jaurlaritzak ezker abertzalearen eta "alderdi demokratikoen" adostasunaren artean aukeratzearen alde egin du.