PP: 'Urkulluk Ibarretxe berria bihurtu nahi izateak kezkatzen gaitu'

Iñaki Oyarzabal Euskadiko PPko idazkari nagusiak adierazi duenez, "Bilduk eta Batasunak bultzatuta, Iñigo Urkullu lehendakariak Ibarretxe berria bihurtu nahi izateak kezkatzen gaitu". Halaber, "litekeena da EAJk subiranotasunaren auzia mahai gainean jarri nahi izatea, kudeaketa ekonomikoagatik azalpenak ez eskaintzeko".

Europa Pressi eskainitako elkarrizketan Oyarzabalek azaldu duenez, "Artur Masek hartutako erabakiak Katalunia eta CiU ari dira kaltetzen, eraso iraunkorraren irudia zabaltzen ari delako, nortasunari lehentasuna emateagatik, eta EAJ horri ari da begira".

"Ematen du duela hilabete arte EAJk nazionalista katalanek hartutako jarrera miresten zuela", esan du Oyarzabalek, "eta irailetik aurrera ikasturte politikoaren lehentasuna Euskal Herrirako estatus politiko berria izango dela iragarri du orain Andoni Ortuzar EBBko presidenteak".

"Ibarretxeren garaian emandako borroka eta banaketa berrian euskal herritarrak nahastu nahi izatea akats handia da", azpimarratu du PPko buruzagiak. "Arreta desbideratzeko asmoa duela ematen du, ekonomia arloan krisiaren aurkako neurririk ez dituelako", deitoratu du.

Horren harira Oyarzabalek gogora ekarri duenez, zortzi hilabete besterik ez dira igaro Urkullu Gobernura iritsi zenetik, eta "estatus berria planteatzeko hitzaldi berriak elkarbizitzarako esparru guztiak goitik behera jartzea dakar". "Bilduk eta Batasunak bultzatuta, EAJk tentsio politiko handia eragingo du euskal gizartean", nabarmendu du.