Epaileak berretsi egin du txupineraren izendapenari ezarritako debekua

Administrazioarekiko Auzien Bilboko 1. Epaitegiak  Jone Artola Bilboko Aste Nagusiaren txupineraren izendapena bertan behera uzteko erabaki berretsi du. Artola Etxerateko kidea da, Txori Barrote konpartsako sortzaileetako bat eta ezker abertzaleko zerrendetan egon da. Epailearen hitzetan, debekua terrorismoaren biktimen eskubideak bermatzeko eta txupinaren jaurtiketa ETAren biktimentzako "iraina" bihur ez dadin hartutako erabakia da.

Horren haritik, Artola "garrantzi politiko eta sozialeko" pertsona dela azaldu du, eta Euskal Herritarrok eta ANV legez kanpoko alderdietako zerrendetan izan dela gogoratu du. Halaber, Etxerateko bozeramaile eta Txori Barroteko (Udalak gaitasun gabe utzi zuen konpartsa, ETAko presoen argazkiak erakusteagatik) sortzaile izan dela azaldu du.

Autoan, epaileak abendaren 9ko ebazpena berrestea erabaki du; horren arabera, Jone Artolaren izendapena debekatzea erabaki zuen, behin-behineko neurrian, Estatuko Abokatutzak Carlos Urquijo Euskal Herrian duen ordezkariaren bidez helegitea jarri zuelako.

Debekua ez da "ideologikoki diskriminatzailea"

Bilboko 1 zenbakiko epaitegiaren ustez, hartutako kautelazko neurria ezin da "ideologikoki diskriminatzaileagatik legez kanpokotzat edo konstituzioaren aurkakotzat hartu". Horren haritik, erabakiak "egoera berezi bati erantzuten" diola esan du, "eta babes berezia merezi duten (biktimen harira) interesen existentzian oinarritzen da", gaineratu du.

Horregatik, "interes horiek egoteak jarduera administratiboa arautzen duten neutraltasun eta objektibotasun printzipioak Euskal Herriko terrorismoaren biktimen babesarekin oso bereziak izatera behartzen du".

Ondorioz, terrorismoaren biktimen babesaren eta aitorpenaren Eusko Legebiltzarraren eta Estatuaren Legeak lehenetsi egiten dira "Aste Nagusiko txupineraren baimenaren izandapenaren gainetik".