Politika -
'Parot doktrina'
56 preso 'berehala' aske uztea eskatuko dute Ines del Rioren abokatuek
'Parot doktrina' "hilda" dagoela esan du Amaia Izko abokatuak. Espainiako Gobernuak "epaia bete" behar duela azpimarratu du; izan ere, ez egiteko "tarte juridikorik ez du".
Erredakzioa
Atzeraeraginkortasunez 'Parot doktrina' aplikatu zaien 56 giltzapetu "berehala" aske uztea eskatuko dute Ines del Rio ETAko presoaren abokatuek. Doktrina bertan behera utzi du gaur Europako Giza Eskubideen Auzitegiak.
Arratsaldean, Bilbon, agerraldia egin dute abokatuek. Auzitegiaren erabakiarekin "pozik" azaldu dira. Horrela, Del Rio presoa aske uztea eskatu dute 'Parot doktrina' bertan behera geratu ostean.
'Parot doktrina' "hilda" dagoela adierazi du Amaia Izko abokatuak.
"Tarte juridikorik ez dago"
Espainiako Gobernuak "epaia bete" behar duela azpimarratu du; izan ere, ez egiteko "tarte juridikorik ez du".
"'Parot doktrina' atzeraeraginkortasunarekin aplikatu zaienak berehala aske uzteko txanda da. Espetxean ematen duten minutu bakoitzean oinarrizko eskubideak urratzen eta mespretxatzen ari dira", erantsi du.
"Laster", datozen egunetan, ETAko beste 56 presoren askatasuna eskatuko dutela azaldu du abokatuak.
Izkoren hitzetan, "Espainiako Estatuak oinarrizko eskubideak urratu dituela berretsi du Europako Auzitegiak, ondorioz, Zuzenbidezko Estatuaren porrota egon da". "Terrorismoaren aurkako politikaren oinarriak" izan direla gaineratu du.
