'Erabakitzeko eskubidearen aldeko akordio zabala' lortu nahi du Sortuk

Sortuk "Euskal Herriaren erabakitzeko eskubidearen aldeko akordio zabala" lortu behar dela defendatu du gaur, eta Kataluniak proposatutako galdeketa "demokrazia ariketa eredugarria" dela esan du, "PPk, PSOEk, Rajoyk eta Rubalcabak" erakutsitako jarrerarekin talka egiten duen arren.

Pernando Barrena eta Amaia Izko Sortuko alderdikideak Donostian izan dira prentsaurreko batean. Bertan, PPri eta PSOEri "Espainiako liburuko beste kapitulu beltz bateko protagonistak" izatea leporatu die. Euren iritziz, "horrek, paradoxikoki, Gobernuaren mespretxuekin nazkatuta dagoen herrialde kataluniarraren independentzia grina pizten du".

Kataluniak 2014ko azaroaren 9rako antolatutako galdeketa "inongo 'bainarik' gabe, demokrazia ariketa eredugarria" dela argi utzi nahi izan dute Barrenak eta Izkok. Gainera, "prozesu osoan zehar", gizarte kataluniarrak izandako jarrera "protagonista" goraipatu dute, baita alderdi desberdinek erakutsitako "konpromisoa" ere.

Euren aburuz, horrek Estatuaren "ezinezkotasunaren eta debekuaren mehatxuarekin talka" egiten du; izan ere, Sorturen ustez, "bide demokratikorik ez eskaintzeak prozesua itxierarekin eta mehatxuarekin blokeatzera bultzatu du Estatua, beste hainbatetan bezala".

Pernando Barrenak euskaraz hitz egin du, eta Amaia Izkok, aldiz, gaztelaniaz. Biek ala biek azpimarratu dutenez, "euskaldunek eta kataluniarrek amets berbera dute". Hala ere, "bi herrien errealitateak desberdinak" direla esan dute, eta batek emandako pausoak ezin direla mimetikoki bestean eman.

"Hori egitea akats larria izango litzateke", adierazi dute Sortuko kideek. "Bi herriek euren erabakitzeko eskubidea onartzea lortzeko prozesuan daudela dute komunean", Barrenaren eta Izkoren arabera, "baina Kataluniak bide kataluniarra jarraitu behar du, eta Euskal Herriak, bide euskalduna".

'Euskal herrian erabakitzeko eskubidearen aldeko akordio zabala' lortzeko beharra defendatu dute hizlariek, eta "Sortu gainontzeko parte-hartzaileekin eta eragileekin batera akordio batera iristeko gogoz amorratzen" dagoela onartu dute.

"Gatazkaren osoko ebazpena lortu nahi dugu, eta oinarri demokratiko batekin bakarrik da posible proiektu politiko guztiak aurrera eramatea, geurea barne. Gure herriaren askatasun osoa nahi dugu", gehitu dute Barrenak eta Izkok.

Azkenik, "olatu independentista" hori ezin dela pasatzen utzi azpimarratu dute, Sorturen iritziz, "bide bakarra, benetakoa, independentzia" baita.