Politika -
Auzitegi Nazionala
AVTren aurka Eibarren izandako oihuak ikertuko ditu Fiskaltzak
Auzitegi Nazionaleko fiskal nagusiak gertakarietan parte hartu zutenei buruzko informazioa biltzeko eta, ahal badu, egileak identifikatzeko eskatu dio Gobernuaren Ordezkaritzari.
Erredakzioa
Terrorismoaren Biktimen Elkarteak (AVT) joan den larunbatean Eibarren egin zuen omenaldian izandako oihuak ikertuko ditu Auzitegi Nazionaleko Fiskaltzak. Horien artean, "gureak kalean daude eta zuenak lurpean" entzun ahal izan ziren.
Aurkeztutako idatzietan, "gertakari horiek mehatxu terroristak, terrorismoaren goratzea edo biktimei irain egitea delituak izan daitezkeen egiaztatzeko" txostenak "lehenbailehen" aurkezteko eskatu die Javier Zaragoza Auzitegi Nazionaleko fiskal nagusiak Gobernuak Euskadin duen Ordezkariari, Carlos Urquijori, eta Ertzaintzaren zuzendariari, Gervasio Gabilondori.
Gobernuaren Ordezkaritzak bere gain dituen polizia indarren bitartez (Polizia Nazionala eta Guardia Zibila) gertakarietan parte hartu zutenei eta oihukatu ziren esaldiei buruzko informazioa biltzeko eskatu du Zaragozak. Gainera, egileak identifikatzen saiatzeko ere eskatu du.
Ertzaintzari ere gauza bera agindu dio, baina, horrez gain, gertakarian egindako argiketa bidaltzeko eskatu dio.
