Oyarzabal: 'Ezinezkoa da aldi berean biktima eta terrorista izatea'

“Zuzenak diren kasuetan”, GALeko eta Batallon Vasco-Españoleko biktimen senideek kalte-ordainak “kobratu egingo dituztela” adierazi du gaur Iñaki Oyarzabal PPko Legebiltzarreko ordezkariak. Edozein kasutan, ukatutako laguntzen kasuetan  “helegitea” jartzeko aukera badagoela gogoratu du popularrak.

Espainitako Barne Ministerioak GALeko 46 biktimari ukatu dizkie kalte-ordainak, asteazken honetan Jorge Fernandez Diaz Barne ministroaren hitzetan, "ETAren ingurukoak izategatik''.

Radio Euskadiri eskainitako elkarrizketan, Oyarzabalek esan du GALEko eta Batallon Vasco Españoleko biktimek “legeak aurreikusten dituen laguntza guztiak” jasoko dituztela, “gainerako terrorismoaren biktimekin gertatu den moduan”.

Jasotako 4.000 eskaeretatik, Gobernuak % 1 bati soilik ukatu dizkiola azpimarratu du eta, edozein kasutan, helegitea jartzeko aukera daukatela gaineratu du. Banakako kasu asko daudela eta, horietatik, “asko onartu egingo dituztela” esan du Oyarzabalek.

“Zuzenak diren kasuetan, senideek laguntzak jasoko dituzte, ziur naiz”, azaldu du. ”Gobernua bere burua zaintzen ari da, batzuek toki batean eta bestean aldi berean egon nahi dutelako. Terrorismoaren biktima izateko, gutxienez, talde terrorista bateko kidea izateari utzi behar diozu. Ezin zara aldi berean biktima eta terrorista izan”, azpimarratu du.