Politika -
Ituna ''bete ez delako''
PSEk EAJrekin duen itunaren jarraipen batzordea deituko du
Krisiari aurre egiteko neurriak sustatu ordez, herritarren arreta distraitzeko subiranotasunaren amua erabiltzea egotzi dio EAJri Jose Antonio Pastorrek.
Erredakzioa
PSE-EEk EAJrekin duen itunaren jarraipen batzordea deituko du datorren maiatzaren 25eko Europako hauteskundeen ostean. Sozialistek azaldu dutenez, Eusko Jaurlaritza eta alderdi jeltzalea "ez dira itun horretan adostutakoa betetzen ari". Krisiari aurre egiteko neurriak sustatu ordez, herritarren arreta distraitzeko subiranotasunaren amua erabiltzea egotzi dio Jose Antonio Pastor PSE-EEren bozeramaileak EAJri.
Pastorrek prentsaurreko batean azaldu duenaren arabera, irailean EAJrekin lortu zuten ituna (ekonomia sustatzeko, langabezia murrizteko, iruzurrari aurre egiteko eta politika sozialak babesteko neurriak biltzen zituen) "ez da adostutakoaren arabera betetzen ari".
Hori dela eta, Pastorrek iragarri du jarraipen batzordea deituko duela jeltzaleek itunaren helburuak lortzeko proposatuko dituzten datak, helburuak eta neurriak zehaztu ditzaten.
Besteak beste, iruzur fiskalarekin bukatzeko Ogasunen elkarrekiko lotura egiteko aurrerapausorik ez ematea, eta enplegua sustatzeko funtsen sormena atzeratzea deitoratu du sozialisten ordezkariak.
