Kongresuko bozeramaile izaten jarraituko du Duran i Lleidak

Josep Antoni Duran i Lleida CiUko liderrak alderdi horretako idazkari nagusi izateari uzteko aukeraren inguruan hausnarketa egiteko "eskubidea" duela esan du. Erabaki hori hartuz gero, baina, aurretik Artur Mas presidentearekin hitz egingo duela gaineratu du, eta, Mas bezala, galdeketa babestearen alde eta abdikazio legearen aurrean abstentzioa babestearen alde agertu da.

"Jende askok politikoki lurperatu nau, baina ez da hori gertatuko; UDCren buru jarraituko dut eta CiUren Kongresuko bozeramailea izaten jarraituko dut", adierazi du Duranek.

CiUren zuzendaritza taldearekin bildu ondoren egin ditu Duranek adierazpen horiek, Kataluniako Gobernua Generalitateko Jauregian batu aurretik.

"Ez dago zertan espekulatu (...); inoiz zerbait badago, nik neuk esango dut", esan du CDCrekin ezadostasunak izan dituela-eta CiUren idazkari nagusi izateari utziko diola zabaldu ondoren. CiUko liderrak ez du erabaki hori baztertu, baina halakorik erabakiz gero CiUren baitan eta Generalitateko eta CDCko buruarekin hitz egin ostean egingo lukeela nabarmendu du.

CiUko bigarren buru moduan dimisioa eman zezakeela aurreratu dute hainbat hedabidek (prozesu soberanistagatik eta abdikazioaren legean abstentzioa emateagatik), baina honakoa azaldu du Duranek: "'Abstentzioa' (Twitterren) eskatu zuen lehenengoa izan nintzen eta, gauzak horrela, ez du horrekin zerikusirik; erabakiren bat hartzen dudan egunean, nik neuk jakinaraziko dut", gaineratu du.