EAJ eta EH Bildu sendo, PSE-EEren eta PPren jaitsieraren aurrean

Hauteskunde autonomikoak orain egingo balira, EAJk irabaziko lituzke. Andoni Ortuzarrek zuzentzen duen alderdiak botoen % 34,2 lortuko lituzke, eta 29 eserleku eskuratuko lituzke Eusko Legebiltzarrean.

Horixe da 2014ko maiatzeko Euskobarometroak euskal herritarren boto-asmoaz ateratako ondorioetako bat. Datuak apirilaren 30etik maiatzaren 19ra etxez etxe egindako 600 inkestetatik atera dituzte.

Bigarren alderdi bozkatuena EH Bildu izango litzateke, botoen % 23,9 eta 22 eserleku lortuta.

PSE-EEri dagokionez, sozialistek hirugarren indarra izaten jarraituko lukete, botoen % 16,5 eta 12 eserleku lortuta. Hala ere, gobernua sortzeko aukerarik gabe geratuko lirateke.

PPk, aldiz, Madrilgo gobernuaren eragina nabaritu eta atzera egingo luke lurralde guztietan, baina Legebiltzarreko laugarren indarra izateari utzi gabe. Arantza Quirogaren alderdiak zazpi eserleku izango lituzke, hautesleen % 8,1en babesa lortuta.

IU/Ezker Anitza eta Podemos/Ahal Dugu, nobedadeak

IU/Ezker Anitza eta Podemos/Ahal Dugu alderdiak izango lirateke Eusko Legebiltzarreko nobedade nagusiak. IU/Ezker Anitzak hiru eserleku lortuko lituzke, eta Pablo Iglesiasen alderdiak, berriz, eserleku bat eta botoen % 4,5.

UPyDren kasuan, ez litzateke aldaketarik egongo, eta boto-emaileen % 3,2ren babesa izango luke.

Parte-hartzea, % 60koa

Euskobarometroaren arabera, parte-hartzea % 60 ingurukoa izango litzateke, baina Bizkaian altuagoa izan liteke. Araban, aldiz, baliteke maila horretara ez iristea.

Galdetutakoen % 70ek nahiko argi dute botoa nori eman. Horien % 26k, aldiz, oraindik ez dakite nori eman botoa, ezta bozkatzera joango diren ere.