Albisteen balizko ordainketagatik UPyDk jarritako salaketa onartu dute

Gasteizeko instrukzioko 3. epaitegiak "EAJren hurbilekoa" den komunikazio talde bati albisteak eta elkarrizketak argitaratzeagatik Eusko Jaurlaritzaren balizko ordainketagatik UPyDk jarritako salaketa onartu du.

Salaketa sinatzen duen Gorka Maneiro legebiltzarkideak zabaldu du autoa; bertan, iruzurragatik, bidegabeko eralgitzeagatik eta prebarikazioagatik aurreko diligentziak abiarazten dituzte.

Salaketan Noticias Taldearen komunikabideetan "albistez mozorrotutako publizitate irregularra" sartu zutela esaten dute, “hiritarrak engainatzen saiatzen eta legea ez betetzen. Guztira, kontratu batzuen batuketa 90.000 eurokoa da.

23 kasuengatik, galderak Legebiltzarrean

UPyDk bost kontratu jarri ditu epailearen aurrean, baina Legebiltzarrean beste 23 kasuren inguruan galdetu du, "horien antzekoak", publizitate irregularrekoak. Maneiro Andres Herzog UPyDk Diputatuen Kongresuan duen idazkari nagusiarekin batera azaldu da prentsaurrekoan. Herzog, gainera, abokatua da eta salaketa erredaktatzeko ardura hartu du.

Autoan, epaileak dokumentazioa eskatu dio Eusko Jaurlaritzari; bigarren fase batean, UpyDk eskatuko du albiste eta erreportaje horien balizko ordainketan parte hartu ahal zuten pertsonek deklaratzeko.

Maneiroren ustez, epai-prozedura abiarazteak esan nahi du bere alderdiak esandakoa baieztatzen duela: eginkizunak delitua izan daitezkeela. Bere ustez, eskandalua eta ustelkeria kasua da.