PPk dio EAJrekin harremanak eteteko 'arriskurik ez' dagoela

Laura Garrido Euskadiko PPren bozeramaileak batzokien finantzaketaren inguruko "azalpenak" eskatu dizkio EAJri "gardentasuna eta erantzunkizuna" bermatzeko. Halaber, "ez dago" arriskurik Alderdi Popularraren eta EAJren arteko harremanak apurtzeko, gaineratu du.

Radio Euskadin egindako elkarrizketa batean, Euskadiko PPren bozeramaileak esan du ez duela EAJren haserrea ulertzen. Izan ere, "harrigarria" iruditzen zaio EAJ bezalako alderdi txiki batek horrenbeste batzoki izatea.

Nolanahi ere, azken asteotan EAJrekin izandako desadostasunek ez dutela bi alderdien arteko harremana "arriskuan" jartzen adierazi du. Hori dela eta, Garridoren ustez, "egokia litzateke" EAJ lasaitzea, jeltzaleak "urduri" baitaude.

Halaber, Javier Maroto Gasteizko alkateak jasandako "jazarpena" dela eta, kexu agertu da.