EAJ: 'Arabako PPk Quiroga baztertu du diskurtso gogorra ezartzeko'

Ramiro Gonzalez Arabako Batzar Nagusietako EAJren bozeramaleak dio Arabako PPk "diskurtso gogorragoa" ezarri duela eta erabaki duela Arantza Quiroga EAEko PPren presidentea "ez duela balio" datozen hauteskundeetarako.

Gonzalez, Gorka Urtaran Gasteizko Udaleko EAJren bozeramailearekin batera, gaurkotasun politikoa aztertzeko agertu dira hedabideen aurrean, eta bereziki, EAJren kontra PPk bideratu duen "kanpaina zitala eta neurriz kanpokoa"ri buruz aritu dira.

Gonzalezen aburuz, azken asteotako adierazpen guztiek PPk Arabako Diputazioan eta Gasteizko Udalean indarra galtzeko aurreikuspenen aurrean duen "erabateko histeria" frogatzen dute.

Hausnartu duenez, PPk "eskuin muturrerako bidea" hartzea erabaki du; hori dela eta, EAEko popularren linea politikoa "ez du markatzen" euren presidenteak, Arantza Quirogak, baizik eta arabarrek, "euren etorkizunagatik oso kezkatuta daudelako".

Arabako PPk Arantza Quiroga “baztertu” duela azpimarratu du, eta bere ustetan, "ageriko sekretua" da "tira-birak" daudela EAEko PPren barruan. Hala ere, Gonzalezek azaldu du EAJk ez dituela erlazioak apurtuko popularrekin, "nahiz eta badirudi hori dela eurek nahi dutena".

Dena den, aurreratu duenez, popularrek Forondako aireportuaren etorkizuna bermatzeko ekintza zehatzak hartzeko konpromisorik hartzen ez dituzten bitartean, ez dituzte PPrekin erabaki garrantzitsuetan akordiorik lortuko, ez politikoak ezta aurrekontuetakoak ere.

Zehazki, Arabako PPren bi bozeramailek atzo egindako adierazpenak aipatu ditu. Horiek, Eusko Jaurlaritzak Aenarekin duela hiru urte adostutako VIAPeko industria aeronautikorako poligonoa eraikitzea baztertu izana salatzen zuten. Hala, Eusko Jaurlaritzak VIAPa baztertu izana gezurtatu du Gonzalezek, eta galdetu du ea zergatik Diputazioak ez duen ezer ez inbertitu proiektu horren garapenean, besteak beste.