Alarde Fundazioak zigortu gabe gezurra esatea egotzi die instituzioei

Alarde Fundazioak "sistematikoki gezurra esatea eta zigorrik ez jasotzea" leporatu die Gipuzkoako Diputazioa, Arartekoa eta Emakunde bezalako instituzioei, Hondarribiko Alardea "diskriminatzailea" dela esateagatik.

Festa antolatzen duen erakundeak gaur "errespetua eta zuzentasuna" eskatu ditu Alardearen inguruan mintzatzean. Izan ere, azken asteetan egindako deklarazioek "publikoaren eta hedabideen erasoak" eragin dituzte.

Zehazki, EH Bildu bezalako alderdiek egindako adierazpenak izan ditu gogoan Fundazioak, eta haiei oroitarazi dienez, "Auzitegi Gorenaren epaiaren arabera, desfilea erabat legezkoa da, eta ez da sexua dela eta diskriminaziorik egiten".

Alarde Fundazioak argi utzi nahi izan du ez duela zerikusirik urtero Jaizkibel konpainiaren inguruan sortzen diren protestekin. Izan ere, elkarte horrek emakumeek eskopetera izateko duten eskubidea defendatzen du. Fundazioaren arabera, "publikoa burujabea da, eta bere iritzia emateko eskubidea du".

"Hondarribiko Alardea ez dadila politikarien eta medioen arteko borrokan modu okerrean erabili exijitzen dugu, erakunde hau beti eztabaida horietatik at egon baita. Ez dezatela iritzi publikoa nahastu", zehaztu dute Alardearen antolatzaileek.

Astebete baino ez da falta Hondarribiko festak hasteko, eta Alarde Fundazioak "zarata desinteresatu eta desitxuratzaile" horrek ez ditzala udalerriko biztanleak "Alardearen eta beste ekintzen bidez Guadalupeko Amaren festak ospatzeaz aldendu" eskatu du.