Politika -
Epsilon eta Hiriko
EAJko kargudunen 'erantzukizun politikoa' berretsi du Legebiltzarrak
Ikerketa batzordearen ebazpenari babesa eman dio Gasteizko Ganberak. Legebiltzarreko talde guztiek (EH Bildu, PSE, PP eta UPyD), EAJk izan ezik, ebazpenari babesa eman diote.
Erredakzioa
Huts egindako Epsilon proiektuan EAJko kargudunek erantzukizun politikoa izan zutela ebatzi zuen ikerketa batzordeak. Batzorde horren ebazpenari babesa eman dio gaur Eusko Legebiltzarrak. Egitasmoak 2007an porrot egin zuen eta kargudun jeltzaleek erantzukizunak zituzten Eusko Jaurlaritzan eta hiru aldundietan.
Legebiltzarreko talde guztiek (EH Bildu, PSE, PP eta UPyD), EAJk izan ezik, ebazpenari babesa eman diote goizeko osoko bilkuran. Bi proiektuk jaso zituzten diru-laguntza publikoak zilegizkoak ziren argitu behar zuen batzordeak: Epsilon, Bat Formulan lehiatzeko helburua zuen, eta Hiriko, auto elektrikoa merkaturatzeko xedea zuen.
2007an, Eusko Jaurlaritzan eta hiru aldundietan, karguak zituzten jeltzaleei erantzukizun politikoak egotzi zizkien ikerketa batzordeak; izan ere, Epsilon egitasmoa estrategikotzat jo zuten, oinarri "sendorik" izan gabe. Gainera, helburuak ez lortzeko arrisku handia zegoela bazekiten kargudunek.
Iragan uztailean onartutako ebazpenean ez da izenik aipatzen, baina Sustapen Ekonomikorako Euskal Kontseilua osatzen zuten. Ana Agirre orduko Industria sailburua organo horren presidentea zen, Juan Jose Ibarretxe (EAJ) lehendakaria zenean. Agirre Justizia sailburuordea da egun, Iñigo Urkulluren Exekutiboan.
