Politika -
Dimisioa
Merce Pigemek kargua utzi du Botere Judizialaren Kontseilu Nagusian
Carlos Lesmesek eskatuta aurkeztu du kideak dimisioa, Andorratik zetorrela soinean 9.500 zituela ustekabean harrapatu ostean.
Erredakzioa
Merce Pigemek Botere Judizialaren Kontseilu Nagusiko (BJKN) kide izateari uko egin dio, eta hala jakinarazi dio, eskutitz bidez, Carlos Lesmes Kontseilu Nagusiko presidenteari. Lesmesek onartu egin du Pigemen dimisioa, eta Senatuari jakinarazi beharko dio erabakia, goi-ganberak kide berria izendatu dezan.
Lesmesek berak eskatu dio Pigemi dimisioa ematea, kontseiluko kidearen inguruan ostiralean kaleratutako informazioen ostean. Horien arabera, Andorratik zetorrela soinean hainbat diru zuela harrapatu zuen Guardia Zibilak ustekabean. Hain zuzen ere, ahizparekin batera zihoan Pigem, eta 9.500 euro zeramatzan berak , eta beste 10.600 euro ahizpak.
Lesmesek bilerara deitu zuen Pigem, eta, jarrera hori delitu ez bada ere, dimisioa aurkeztu beharra jakinarazi zion, ‘’ Botere Judizialaren Kontseilu Nagusiak, epaileen gobernu organo gorena den heinean, eredugarri eta herritarrentzat konfiantzaren adierazle izan behar duelako’’.
“Erabilitako auzia”
Bidalitako gutunean, Merce Pigem larunbatera arte CiUk Botere Judizialaren Kontseilu Nagusian zuen kideak ziurtatu egin du bere auzia “erabili” dutela, Kataluniako egoera politikoaren harira, eta, nahiz eta deliturik ez duen egin, hedabideek “ankerkeriaz zabaldutako” kanpaina baten biktima izan dela.
Horrez gain, eskutitzean onartu duenez, azaroaren 15ean, Andorrako aduanako kontrol batean, dirua soinean zeramala onartu zion Guardia Zibilari. Berak ez du kopurua zehaztu, baina, argitaratutakoaren arabera, 9.500 euro zeramatzan. Antza, bere aitak (Andorrako bizilaguna da) oparitutako dirua da.
“Ez zuten aktarik idatzi ez nuelako deliturik egin, nahiz eta ukaezina den erabiltzeko erraza dela, eta hala izan da”, gaineratu du.
“Egoera zail bati aurre egin behar diot, eta sentimendu kontrajarriak ditut”, Pigemen hitzetan. “Min handia eman dit nire dimisioa eskatzeak, baina ulertzen dut auzi hau erabiltzean, min handia egin liezaioketela herritarrek erakunde honetan duten konfiantzari, are gehiago berez ahula dela aintzat hartuta”.