BJKN: 'Konstituzioak komunikazioen sekretua babesten du'

Aldez aurretik epailearen baimena ez duten telefono-entzuketak egitea zaila dela uste du Botere Judizialaren Kontseilu Nagusiak, Konstituzioak horretarako tarterik uzten ez duelako. Gobernuak Prozedura Kriminaleko Legearen erreforma egin nahi du, baina puntu horretan Exekutiboaren proposamenarekin oso kritiko agertu da Botere Judizialaren Kontseilu Nagusia.

Kontseiluak ezohiko osoko bilkura egin du gaur Gobernuaren proiektua aztertzeko. Txostena aho batez onartu du epaileen gobernu organoak. Hala eta guztiz ere, txostena Exekutiboarentzat ez da loteslea. Horrela, Barne Ministerioko arduradunek epailearen baimenik gabe telefono-entzuketak agintzeko aukeraren inguruan zalantzak azaldu dituzte magistratuek.

Justizia Ministerioaren testuarekin orokorrean positiboa da txostena, baina araudi berriaren zenbait aspekturekin oso kritikoa da aldi berean, batez ere telefono entzuketei dagokionean.

Barne ministroak edo Segurtasun Estatu idazkariak telefono-entzuketak egiteko agindua emateko aukera jasotzen du Exekutiboaren testuak, nahiz eta epailea jakinaren gainean jartzeko 24 orduko epea izan. Gero magistratuak 72 orduko epea izango du entzuketa onartu edo baliogabetzeko.

Aukera horren inguruan “zalantza handiak” azaldu ditu gaur epaileen gobernu organoak. Txostena Juan Manuel Fernandezek, Fernando Grande-Marlaskak eta Rafael Mozok egin dute, baina Kontseiluko bokal guztiek babesa eman diote.