Zigor Kodearen erreforma atzera botatzeko eskatu dio NBEk Espainiari

Espainiako Gobernuak azkenaldian egindako lege erreforma batzuk kritikatu dituzte Nazio Batuen Erakundeko bost kontalarik. NBEko kontalarien hitzetan, herritarren oinarrizko eskubideak murriztu ditzakete. Horregatik, erreformak atzera botatzea eskatu dute.

Maina Kiai bilera baketsu eta elkartzeko askatasun eskubideen kontalariak eta David Kaye adierazpen eta iritzi-askatasun eskubidea babesteko eta sustatzeko kontalariak sinatu dute agiria.

Era berean, Ben Emmerson terrorismoaren aurkako borrokan oinarrizko giza eskubide eta askatasunak babesteko kontalariak; Francois Crepeau etorkinen giza eskubideen kontalari bereziak eta Michel Forst giza eskubideen defendatzaileen kontalari bereziak adierazpena sinatu dute. Aditu independenteak dira guztiak.

Agiriaren arabera, “Kongresuak premiazko prozedura batean Zigor Kodearen erreformarako lege-proiektua onartu eta gero” heldu da adituen eskaera.

Desordena publikoak eta herritarren segurtasuna

Senatuan eztabaidatzen ari diren beste bi zuzenketa proiektu kritikatu dituzte kontalariek: Zigor Kodea desordena publikoen delituei dagokiena eta Herritarren Segurtasunerako Lege Organikoa.

“Erreforma proposamenak Espainian azken urteetan gertatu diren manifestazio ugarien aurrean botere legegileak eta Gobernuak eman nahi duten erantzuna izateak kezkatzen gaitu”, azaldu dute.

NBEko adituen arabera, terrorismo delituen definizioak Zigor Kodearen erreformetan “zabalegiak eta zehaztugabeak” dira.

“Idatzita dagoen bezala, terrorismoaren aurkako legeak terrorismoa ez diren jokabideak kriminalizatu ditzake eta, besteak beste, adierazpen askatasuna gauzatzeko aukera gehiegi murriztu dezake”, azpimarratu du Kayek.