Politika -
Ezker abertzalea
Barrenak Ortuzarri: 'Zereginak ez dizkigu EAJk ezartzen'
Bestalde, "mendeku justizia" inposatzeko helburuz, "prebarikazioa egiteko prest" egotea egotzi dio Espainiako Estatuari.
Erredakzioa
Pernando Barrena Sortuko bozeramailea Andoni Ortuzar EAJko presidenteari zuzendu zaio, eta ezker abertzaleari zereginak ez dizkiola EAJk ezartzen ohartarazi dio.
Buruzagi abertzaleak prentsaurrekoa eskaini du Donostian, Auzitegi Gorenak presoen zigor pilaketari buruz erabakitakoa baloratzeko.
Agerraldi horretan, Ortuzarrek esandakoa ere hartu du hizpide. Hain justu, ezker abertzaleak "bake eta bizikidetza arloan zeregin ugari" dituela adierazi du EAJko presidenteak goizean Radio EiTBn.
Horren ildotik, "ezker abertzaleari zereginak ez dizkio jartzen ez Ortuzarrek ez EAJk", erantzun du Barrenak.
Bestalde, Gorenak presoen zigorrak pilatzea baztertu duela eta, bozeramaile abertzaleak "irizpide bidegabea eta Europako legediaren aurkakoa" ezarri izana deitoratu du.
Sortuko bozeramaileak bidegabetzat jo du presoak "zigorra bi aldiz betetzera behartzea" delitu beragatik, "lehenengo Frantzian eta ondoren Espainian" bete beharko baitute espetxealdia.
"Espainiako Estatuak erakutsi egin du ez dela zuzenbide-estatua, prebarikazioa egiteko prest baitago mendeku justizia ezartzeko eta [presoei] oinarrizko eskubideak ukatzeko", salatu du.
