Politika -
Hauteskunde orokorrak
EAk dio erabakitzeko eskubideak bideratuko lukeela aldaketa Espainian
Urizarren arabera, aldarrikapen hori bermatuko lukeen adostasunik lortzeko aukerarik ez badago, "akordioa euskal gizartearekin" egin beharko litzateke.
agentziak | erredakzioa
Pello Urizar Eusko Alkartasuneko idazkari nagusia Espainiako Estatuan aldaketa politikoa egitearen alde agertu da, eta EH Bilduk horretan lagun lezakeela esan du, baina erabakitzeko eskubidea bermatuz gero, bestela ez bailitzateke aldaketa izango, "adabakia baizik".
EAk Donostiako Miramar Jauregian ekin dio kurtso politikoari, eta bertan egin ditu Urizarrek adierazpenok. Espainiako Estatuan hauteskunde orokorren ostean aldaketa politikorako "aukera benetakoa" dela adierazi du.
Hasier Arraizek uztailean aurreratu bezala, Urizarrek esan du EH Bilduk aldaketa horretan parte hartuko duela baldintza bat betetzen bada: euskal herritarren erabakitzeko eskubidea aitortzea.
"Edonolako aldaketa egiteko, argi dugu, erabakitzeko eskubidean oinarritu behar da. Erabakitzeko eskubidean oinarritzen ez den aldaketa ez da aldaketa, adabakia besterik ez da, gauzak dauden bezala uztea besterik ez da", berretsi du buruzagi abertzaleak.
Bidea euskal gizartearekin egitea
Urizarren arabera, aldarrikapen hori bermatuko lukeen adostasunik egiteko aukerarik ez badago, "akordioa euskal gizartearekin" egin beharko litzateke.
"Bidea euskal gizartearekin egin behar dugu, eta amaierara arte eraman, gizarte kataluniarraren moduan", EAren arabera, baina hori EAJ gabe egitea "zailagoa" dela aitortu du, nahiz eta gauzatu egingo dela pentsatu, "gehiengo sozialak" nahi duelako.
