'Iragana argitu'ko duen prozesuaren alde agertu da Urkullu

Iñigo Urkullu lehendakariak iraganaren berrikuspen kritikoa zintzotasunez partekatzeak duen garrantzia nabarmendu du, elkarguneak topatzeko eta bizikidetza bideratzeko. Zentzu horretan, honako hau azpimarratu du: "Iraganak min ematen digu eta banatu egiten gaitu, hori da zailtasun nagusiena, mesfidantza politikoaren iturri da". Horregatik, beharrezkoa da "elkarri konfiantza politikoa eragingo duten gauzak esatea eta oinarrizko konpromiso bat partekatzea".

Donostiako San Telmo museoan egin diren 'Autokritikaren balioak' jardunaldiei amaiera emateko ekitaldian egin ditu adierazpen horiek lehendakariak.

Lehendakariak gogoratu du autokritikarena ez dela kontu berria, baizik eta euskal erakundeek duela zenbait legegintzalditik egiten ari direla eta Gobernu Kontseiluak joan den irailaren 22an adostu zuen Batera Konpromisoan jasota dagoela. Hala ere, bide horretan sakontzea beharrezkoa dela iritzi dio, "jarrera zintzo leial batez eta oinarri sendo batzuen gainean".

Horrez gain, iraganari buruzko gogoeta kritikoan "gabezia garrantzitsua" dagoela errepikatu du, zeren Batallón Vasco Españolek, GALek edota polizia gehiegikeriek eragindako kalteen gainean akordio orokor bat badago ere, "guztiak ez daude ados ETAk eragindako erailketen injustizia aitortzerakoan". "Ezker abertzaleak erantzukizun zehatza dauka, eta ETAren indarkeriak eragindako kalteen berariazko balioespena eskatzen du", adierazi du.