Politika -
Osoko-bilkura
Bi ahaleginen ostean, EAEANko presidentea aukeratuko dute gaur
BJKNk Auzitegiaren ordezkari nagusia izendatzea espero du eta, bestalde, Gipuzkoako Probintzia Auzitegiko presidentea ere aukeratuko dute.
Erredakzioa
Botere Judizialaren Kontseilu Nagusiak EAEko Justizia Auzitegi Nagusiko presidentea eta Gipuzkoako Probintzia Auzitegiko presidenteak hautatuko ditu gaur egingo duten osoko-bilkuran, Kontseiluko iturriek baieztatu dutenez.
Bi aukeraketa prozesuk porrot egin ostean (hautagaietako inork ez zituen gutxieneko 13 boto jaso), EAEko Auzitegiaren ordezkari nagusia behingoz izendatuko dutela espero dute.
Kargu hori hutsik dago duela urte baino gehiagotik, izan ere, Fernando Ruiz Piñeirok, APMri lotutakoak, duela 13 hilabete amaitu zuen lehen agintaldia EAEko Auzitegi Nagusiaren buru zela.
Aurreko bi aukeraketa prozesuetan berriro izendatzeko esperantzarekin aurkeztu ostean, Ruiz Piñeiro ez da hirugarrenean aurkeztu, nahikoa babes lortu ez duelako.
Gainerako hautagaiek bai, parte hartuko dute hirugarren aukeraketa prozesuan. Hala, Jaime Tapia Arabako Probintzia Auzitegiko epaile eta Jueces para la Democraciako (JpD) hautagaiak bere burua aurkeztu du; Juan Luis Ibarra EAEANko Administrazioarekiko Auzitegiko Aretoko presidenteak eta Juan Mateo Ayala Epaitegietako Dokumentazio Zentroko zuzendariak egin duten moduan. Badirudi azken horrek lortuko duela beharrezko babesa.
Gipuzkoako Auzitegia
Gaurko osoko-bilkuran, BJKNk Gipuzkoako Probintzia Auzitegiko presidentea ere hautatuko du. Maria Victoria Cinto JpDkoak, bi agintaldi eta gero, kargua utziko du.
Hiru dira hautagaiak: Juan Pablo Gonzalez APMri lotutakoa, Iñaki Subijana eta Luis Blanquez.