Podemosek Gizarte Larrialdiko Legea tramitatzeko babesa jaso du

Podemosek beharrezko babesa jaso du Kongresuan Gizarte Larrialdiko Legearen proposamena tramitatzeko; izan ere, PSOEk, Compromisek, ERCk, EH Bilduk eta Nueva Canariasek baiezkoa eman diote proposamen horri. Neurri-sorta da lege-proposamen hori, 'Plan 25' izenekoaren barnean; xede du Giza Eskubideen Aldarrikapen Unibertsaleko 25. artikulua betetzen dela bermatzea.

Parlamentu-ekimenak PPren aurkako botoa izan du, eta Ciudadanos, Democracia y Libertad eta EAJ abstenitu dira, zeren eta uste baitute autonomia-eskumenak inbaditzen dituela. Hala, ekimena kontuan izango dute gaurko azken orduan, baina baliteke ez tramitatzea; izan ere, aukera dago Gorteak desegiteko.

Giza Eskubideen Aldarrikapen Unibertsalaren gaineko kartelak

Eztabaidaren hasieran, Podemoseko diputatuek, Pablo Iglesias barne, hainbat kartel altxatu dituzte; kartelak Giza Eskubideen Aldarrikapen Unibertsalaren gainekoak ziren.

Rafa Mayoral Podemoseko zuzendariak azaldu duenez, lege-proposamenak lau neurri nahi du jarri abian: beste aukerarik gabeko nahitaezko husteak segituan gelditzea, energia-mozketak eta osasun-koordainketak ez egotea, eta indarkeria matxistako biktimek beste etxe batean egoteko aukera bermatzea. Gainera, proposatzen du indarkeria matxistako biktimen kontzeptua zabaltzea, salerosketako biktimak eta mutilazio genitalekoak ere bertan txertatzeko.

Mayoralek ohartarazi du Espainian indize altua dagoela genero-indarkeriari dagokionez, eta, halaber, esan ere esan du pobrezia ezin dela oztopoa izan emakumeek ihesbiderik ez izateko giza eskubideak urratzen badizkiete: "Administrazio publikoek bermatu behar diete beste irtenbide bat", nabarmendu du.

Mayoralek, gainera, arbuiatu du herritar batzuek ez izatea eskubidea osasun-arreta izateko; izan ere, gaixoek koordainketak ordaindu behar dituzte, eta, beste batzuetan, ospitaleak okupatu behar izaten dituzte botikak jasotzeko.