Barcenasek 'nazka' ematen diola berretsi du Marotok epailearen aurrean

Javier Maroto PPko Ekintza Sektorialeko idazkariordeak epailearen aurrean esan duenez, Luis Barcenas PPren diruzain ohiak "nazka" ematen dio, alderdiari eragin dion "kalte izugarriagatik".

Madrilgo Instrukzioko 11. Epaitegian deklaratu du, goizean, Marotok, Barcenasek jarritako kereila batengatik; irainak eta gezurrak esatea leporatuta jarri zuen Gasteizko alkate izandakoaren aurkako helegitea PPren diruzain ohiak, eta epaileak tramitera onartu zuen.

Deklaratu ondoren, epaitegiaren atarian kazetarien aurrean esan duenez, "guztiz beharrezkoa" da militante popularren gehiengoak Barcenasi buruz pentsatzen duenari komunikabideen aurrean "ahotsa jartzea".

Telecinco telebista-kateko saio batean, iazko uztailean, Barcenasen inguruan esan zituenagatik deklaratu du gaur Marotok epaile aurrean. Orduan esan zuenez, "nazka" ematen dio Barcenasek. "Gaizkilea" dela ere esan zuen, baina ondoren hitz hori zuzendu eta "ustezko gaizkilea" dela esan zuen.

Hitz horiek berretsi egin ditu Marotok gaurko deklarazioan, eta "nahi duena" esateko adierazpen askatasuna aldarrikatu du. "Nire iritzia ez da aldatu", gaineratu du.

Ustelkeriaren aurrean, "jarrera irmoa" eta "zero tolentzia" izatea beharrezkoa dela nabarmendu du. "Barcenas kasuan ustelkeria egon dela frogatzen bada, zigorra bete eta dirua itzuli behar da", esan du.

Barcenasen erantzuna

Berehala etorri da Barcenasen erantzuna, eta Marotok erabilitako hitz berberak erabili ditu: "izugarrizko nazka eta higuina ematen dit Marotok", esan du.

Gasteizko alkate ohia "maila eskaseko politikaria" dela esan du eta ez duela "inolako sinesgarritasunik". Errugabetasun-presuntzioan ez sinestea leporatu dio Marotori.