Arrosaren jaian EAJren kontra esandakoak kritikatu ditu Urkulluk

PSEren Gobernuaren lehen urteari buruz atzo, Arrosaren jaian, egindako balantzea "ebidentziaren ukapenean", "atseginean" eta "EAJren aurkako txahala botatzean" oinarritu zela esan du gaur Iñigo Urkullu EAJko presidenteak.

Patxi Lopez lehendakariak Euskadi orain urtebete baino hobeto dagoela asko errepikatzeak "lerro bat gainditzeko arriskuan" dagoela argi utzi zuen, buruzagi jeltzaleak bere blogean idatzitako azken mezuan azaldu duenez, "erantzukizun ezaren lerroa, hain zuzen ere" eta, antza denez, Lopezek "atzo zeharkatu nahi izan zuen".

Azken 30 urteetan Euskadik izandako garapena "nahita" ahaztea ezinezkoa dela salatu du Urkulluk, eta Lopezek bere lorpenak "terrorismoaren aurkako borrokan izandako garaipenen triunfalismoan" oinarritzea kritikatu du.

Ekitaldi horretan sozialistek "epelak esan" zituztela adierazi du EAJko buruzagiak. Lehendakariaz gain, Jose Antonio Pastor Bizkaiko sozialisten idazkari nagusiak Jose Luis Bilbao Bizkaiko diputatu nagusia gogor kritikatu zuen. "EAJ eta gure kargudun batzuk iraindu zituzten", esan du Urkulluk. "Taberna bateko barran esaten diren irainak dira, eta ez lehendakariaren ekitaldi publiko batean", erantsi du.

Madrileko "eskema"

"Ebidentziaren ukapena, atsegina eta EAJren aurkako txahala botatzea, garai berri honen lehen urteko balantzearen bukaera tristea izan zen", azaldu du Urkulluk. Madrilen, sozialistek PPren kontra jarraitzen duten "irain eta sesioen eskema" Euskal Herrira ekarri nahi dutela ematen du, jeltzalearen ahotan.

PSEren zein PSOEren politika ekonomikoak kritikatu ditu buruzagi jeltzaleak. "Nazioarteko testuingurua laguntzeko zain, kontrolik gabe zorpetzea, herrialde serio batek har dezakeen arriskua" ez dela gaineratu du Urkulluk.