Daniel de Alfonsok ez du dimitituko: 'Ez dago legez kanpo ezer ere'

"Ustelkeriaren kontra lanean" jarraituko duela berretsi du Daniel de Alfonso Kataluniako Iruzurraren kontrako Bulegoko zuzendariak, eta Jorge Fernandez Diaz jarduneko Barne ministroarekin izandako elkarrizketetan "legez kanpoko ezer ere ez" dagoela berretsi du. Ez du dimisiorik emango, honenbestez. Kataluniako Parlamentuak, ordea, kargutik kentzeko prozesuari ekin zion atzo, eta taldeek gaur eztabaidatuko dute batzordean. Hain justu, Erakundeekiko gaien Batzordean agerraldia egin baino lehen, idatzia bidali die De Alfonsok komunikabideei, bere jarrera argitzeko asmoz, nonbait.

Haren eta Kataluniako Iruzurraren kontrako Bulegoaren ospearen kontra dagoen "kanpaina sutsua" salatu du De Alfonsok, eta bere lan horretan "inpartzialtasunez eta independentziaz" jarduten jarraituko duela berretsi du.

Idatzian dioenez, "ohituta" dago presio politiko, instituzional eta soziala jasotzera, eta ulertzen badu ere, ez du uste "demagogiak jotako kanpainen biktima" izan behar duenik.

Jorge Fernandez Diaz Barne ministroarekin izandako solasaldiaren harira, interpretazio "interesatuak" egin daitezkeela ohartarazi du, batez ere hauteskunde bezperan.

"Egindakoa berresten dut"

De Alfonsoren iritzian, entzuketen edukiak ez dio inongo alderdiri kalte egin, ezta mesede ere. "Grabazio horien edukian ez dago deliturik, eta jarrera mafiosoen bidez lortu dituzte", erantsi du.

Are gehiago, egindakoa berretsi du. "Gure egitekoa betetzeko helburuarekin eta legea zorrotz errespetatuta, gure jarduera, gure bilerak eta gure hartu-emanak berresten ditut", elkarrekin erabili ahal izan duten "lagunarteko hizkera" gorabehera.

Hori horrela, Parlamentuak emandako agindua betetzen jarraituko duela nabarmendu du.