Politika -
DIPUTATUEN KONGRESUA
Rajoyren kontrako zentsura-mozioa atzera bota du Kongresuak
EH Bilduk alde bozkatu du, eta EAJ abstenitu egin da. Unidos Podemosen ekimenak 82 diputaturen babesa jaso du, 170ek kontra bozkatu dute eta 97 abstenitu egin dira.
AGENTZIAK | ERREDAKZIOA
Aurreikusi bezala, Espainiako Diputatuen Kongresuko Osoko Bilkurak atzera bota du Mariano Rajoy presidente kargutik kentzeko Unidos Podemosek aurkeztutako zentsura-mozioa. Pablo Iglesias Presidentetzarako hautagaiak aldeko 82 boto jaso ditu, eta 170, kontra. 97 diputatu abstenitu dira.
Kongresuko araudian jasota dagoen bezala, zentsura-mozioaren bozketa publikoa izan da. Ana Pastor Kongresuko Mahaiko presidenteak banan-banan esan ditu diputatu guztien izen-abizenak, eta horietako bakoitzak ahoz eman du bere botoa, bere eserlekutik, zutik jarrita.
Zozketa bidez aukeratuta, Juan Vicente Perez Arias PPko diputatua izan da botoa ematen lehena, 16 orduko eztabaida sutsua izan ondoren.
Unidos Podemos-En Comu-En Marea taldeak (67), Compromisek (4), ERCk (9) eta EH Bilduk (2) babestu dute zentsura-mozioa.
Beste hauek, berriz, kontrako botoa eman dute: PP (134), Ciudadanos (32), Foro Asturias (1) eta Coalicion Canaria (1). Gainerako alderdietako diputatuek, abstentziora jo dute: PSOE (84), PDeCAT (8), EAJ (5) eta Nueva Canarias (1).
Rajoy boteretik kentzeko, Iglesiasek Kongresuko gehiengo osoaren babesa behar zuen, 176 boto gutxienez.
