EH Bildu: 'Euskal errepublika propioa izan behar dugu'

"Burujabe hobe" lelopean, milaka lagunek manifestazioa egin dute gaur eguerdian Iruñean, Independentistak sare herritarrak deituta, eta bertan izan dira EH Bildu eta EH Baiko ordezkariak ere.

Txutxi Ariznabarreta Independentistak sareko kideak salatu du Espainiako Estatua "inboluzio politikoan murgilduta" dagoela eta Kataluniako zein Euskal Herriko eskubide politiko eta sozialei eraso egiten ari zaiela. Hala, "erresistentziatik kontraerasora pasatzeko" eskatu du eta irtenbidea "euskal estatua eraikitzea" dela esan du.

Kataluniako prozesu subiranistaren auzian, Espainiak "bere aurpegirik gogorrena" erakutsi duela uste du Ariznabarretak, independentismoa "sustraitik desegin nahi" duela, eta horren aurrean, aurrera egiteko aukera bakarra "Euskal Herrian prozesu subiranista bat abiatzea" dela nabarmendu du: "Euskal errepublika aldarrikatu behar dugu".

 

 

Gauza bera esan du Pello Urizar EAko idazkari nagusi eta EH Bilduko kideak ere: "Gure eskubide nazionalak eta sozialak defendatzeko bide eraginkorrena Euskal Errepublika eraikitzeko urratsak ematea da".

Espainiak Kataluniako autonomian esku hartzeko hartu dituen neurriak "izozmendiaren punta" besterik ez dira, Urizarren iritziz, eta "Estatuaren barruko nazioak duten estatus politikoa" nahiz "irabazitako eskubide zibil eta sozial asko" zalantzan jarri dituzte.

 

EH Bilduk eskubide horiek defendatzeko beharra nabarmendu du. "Defentsa horrek ez du erresistentzia hutsa izan behar" eta modu bakarra dago eskubideen defentsa horretan aurrera egiteko Urizarren iritziz: "euskal errepublika propioa izatea". Hala, adostasun estrategiak adosteko deia egin die eragile guztiei.

 

Eguerdian Sarasate pasealekuan hasi eta amaitu den manifestazioren ostean, ekitaldi politikoa egin dute, eta ondoren, egun guztiko jaiari hasiera eman diote: bazkari herrikoia, musika etab. Euskal Herriko jubilatuen elkarteko ordezkaritza bat eta feministen ordezkaritza bat ere Iruñean izan da.

Ezker abertzaleak Iparraldean ere kontzentrazioa egin du Euskal Herria Bai eta Aitzinak deituta. Donibane Garazi aukeratu dute Aberri Eguna ospatzeko, "Herria eraiki, herriak erabaki lelopean". Herria erakitzen eta erabakitzeko eskubidea aldarrikatzen jarraitu behar dela azpimarratu dute eta eskaria egin diote Frantziako Gobernuari: Erabakitzeko eskubidea onartu diezaiela Frantziako eskualde guztiei.