Ezenarro: 'Hauteskundeetan Batasunarekin lehiatzeko irrikaz gaude'

Aintzane Ezenarro Aralarren Legebiltzarreko bozeramaileak esan du "Hauteskundeetan Batasunarekin lehiatzeko irrikaz" daudela, izan ere, bere alderdia gero eta egonkortuago dagoela uste du eta ez du pentsatzen Batasuna hauteskundeetan egoteak kalte egingo diola.

Radio Euskadin egin dioten elkarrizketa batean, Aralarren Legebiltzarreko bozeramaileak Eusko Jaurlaritza kritikatu du Batasunak eman dituen pausoen aurrean "eragozpen" gehien jartzen dituena delakoan, Eusko Legebiltzarraren egungo osaketari eusteko.

Ezenarrok ez omen du "ulertzen" Batasunaren alderdi berriak Alderdien Legea betetzea "ez izatea nahikoa" hauteskundeetan parte hartu ahal izateko.

"Inkoherentzia bat da", adierazi du Aralarren bozeramaileak. "Batasunak oso pauso handia eman du, izan ere, lehenengo aldia da indarkeria errefusatzen duela, nahiz eta ez duen ETA aipatu, eta uste dut ez direla Batasunaren pausoak nahikoa baloratu", gaineratu du.