Manuel Marchena kontserbadorea izango da Botere Judizialaren Kontseilu Nagusiko burua

PSOEk eta PPk Manuel Marchena kontserbadorea Espainiako Botere Judizialaren Kontseilu Nagusiko presidente izatea adostu dute, Pedro Sanchezen Gobernuko iturriek jakinarazi dutenez. Espainiako Botere Judizialeko erakunde gorena hogei kidek osatzen dute, eta gehiengo progresista izango du, 11 progresista eta 9 kontserbadore baititu.

PPk Manuel Marchena proposatu zuen kargurako. Gobernuaren esanetan, erakundea berritu ahal izateko onartu du Marchenaren izendapena. Gainera, negoziazioari esker, kide gehienak progresistak izango dira.

Manuel Marchena Auzitegi Goreneko Bigarren Aretoko presidentea da gaur egun, eta Kataluniako buruzagi independentisten aurkako epaiketan epaimahaiko kideetako bat izatekoa zen.

Astelehen honetan amaituko da Diputatuen Kongresuak taldeei emandako epea Botere Judizialaren Kontseilu Nagusirako hautagaiak aurkezteko.

Espainiako Botere Judizialeko Kontseilu Nagusiko hogei kideetako hamar Kongresuak aukeratzen ditu, eta Senatuak hautatzen ditu gainerako hamarrak. Hautagaitzak aurkezteko epea abendura arte egongo da zabalik.