Politika -
Legebiltzarreko Batzordea
Ertzaintzak greba orokorrean egindako 'lan ona' defendatu du Aresek
"Ertzaintzak ez zuen greba egitea oztopatu, pikete hertsagarrien eta istilu-sortzaileen ekintzak saihesteko eskura zuen guztia egin zuen", adierazi du Herrizaingo sailburuak.
Erredakzioa
Urtarrilaren 27ko greba orokorrean Ertzaintzak egindako "neurriko lan profesional ona" defendatu du Rodolfo Ares Eusko Jaurlaritzako Herrizaingo sailburuak, izan ere, "egoera zailean, egindako lanarekin kalte handiagoak ekidin zituen".
"Ertzaintzak ez zuen greba egitea oztopatu, pikete hertsagarriek eta istilu-sortzaileek autobusen garajeak blokeatzea edo industrialdeak ixtea saihestu zuen", adierazi du Aresek.
Eusko Legebiltzarreko Herrizaingo, Justizia eta Erakundeetako Batzordean agerraldia egin du Aresek, Juanjo Agirrezabala EAko legebiltzarkideak eskatuta. ELA, LAB, STEE-EILAS, EHNE e HIRU sindikatuek urtarrilaren 27rako deitutako greban izandako istiluei buruz azalpenak emateko eskatu dio Agirrezabalak sailburuari.
EAren kritikak
Gasteizen izandako liskarren bideo bat proiektatu du EAko legebiltzarkideak, eta Bilboko eta Donostiako manifestaldietan "Ertzaintzak manifestariei eraso egin eta zenbait lagun zauritu" zituela salatu du.
"Dena okertu zen Ertzaintzaren neurriz kanpoko ekintzak egoera tenkatu egin zuelako eta ordura arteko normaltasuna hautsi zuelako", kritikatu du EAko ordezkariak. Gainera, Ertzaintzaren ekintza "neurrigabea" argitzea beharrezkoa dela esan du Agirrezabalak. "Erantzuleak bilatzea beharrezkoa da, etorkizunean ekintza irizpideak aldatzeko", erantsi du.
Agirrezabalaren adierazpenak kritikatu ditu Herrizaingo sailburuak, bere ondorio propioak atera dituelako. "Gertatutakoa argitzeko baino Ertzaintzaren jokabidea kritikatzeko interes handiagoa" duela argudiatu du Aresek.