Atxilotutako Segiko ustezko hiru kideetatik bi kartzelan sartu dituzte

Asteazken honetan Basusarren atxilotutako Segiko ustezko hiru kideetatik bi kartzelan sartu dituzte. Jacinto eta Xalbador Ramirez Cruz espetxera bidali dituzte beraien aurkako euroaginduen berri eman ostean.

Iturri ofizialen arabera, atxilotuak Pauko Auzitegiko Fiskaltzaren aurrean izan dira, eta ondoren, espetxera bidali dituzte, Auzitegi Nazionalak beraien aurka aurkeztutako euroagindueen harira Frantziako agintarien erabakiaren zain.

Endika Perez Gomez da atxilotu duten Segiko ustezko hirugarren kidea. Baliteke ostegunean Pauko Auzitegira eramatea.

Frantziako Polizia Judizialak Polizia Nazionalarekin batera atxilotu du gaur Basusarren (Lapurdi) Endika Perez Segiko ustezko kidea. Perezekin, zazpi dira jada Espainiako Justiziak emandako euroaginduen ondorioz atxilotutako gazteak.

Terrorismoaren kontrako borrokan aritzen diren iturriek jakitera eman dutenez, 13:00a aldera atxilotu dute Perez euroaginduen kontra eta bere lagunen atxiloketa salatzeko emandako prentsaurrekoaren ostean.

Perezen atxiloketaz gain, Jacinto eta Xalbador Ramirez atzeman dituzte gaur goizean, Bergoi Madernaz eta Aiala Zaldibar atxilotu zituzten Baionan eta Aitziber Plazaola eta Beñat Lizeaga Urkidi egun berean Donibane Garazin.

Beraz, urritik atxilotzeko eta entregatzeko euroagindupean dagoen eta atzeman ez duten Segiko ustezko buruzagi bakarra Irati Tobar Eguskiza da.

Zortziek protestako itxialdia egin zuten euroagindu horien kontra.