Politika -
EH Bildu
Iriarte: 'Gure herrialdeak soilik indarrak batuta egin dezake aurrera'
EH Bilduko bozeramaileak "gure herrialdean, gure eskubideetan eta gure askatasunean sinesten dutenen" batasuna defendatu du, Espainiar estatuko eskuinen batasunaren aurka.
Agentziak | Erredakzioa
Maddalen Iriarte EH Bilduko bozeramaileak batasunerako mezu bat igorri du, "gure herrialdeak soilik indarrak batuta aurrera egin dezakeela uste duten pertsona guztiei hel dakien". Mezua "gure herrialdean, gure eskubideetan eta gure askatasunean sinesten dutenei" dago zuzenduta.
Bermeon egin den ekitaldi batean hartu du parte Iriartek, Bittor Asteinzala udalerriko alkategai bezala aurkezteko.
Legebiltzarkideak ohartarazi duenez, "besteek, gure herrialdean sinesten ez dutenek, errespetatzen ez dutenek, batzea erabaki dute. Hamarkadetan sakrifizio handiarekin eraiki dugun guztia bukatu behar dela erabaki dute. Gure eskubideak, gure herrialde kontzientzia, gure bizitzeko modua, gure kultura, gure borondate burujabea. Horrekin guztiarekin bukatu nahi dute".
"Defendatu behar dugu eraiki nahi dugun herria, herri inklusiboa, aurreratua, feminista, demokratikoa, justizia soziala oinarria duen herria. Gizarte hobea eraikitzeko behar ditugun erreminta politiko, instituzional, sozial eta ekonomikoak defendatzea, hori izan behar da konpartitutako helmuga", nabarmendu du.
"Euskaldunok elkarrekin, batuta, aurrera egin behar dugu. Herri honetan sinesten dugunok aliatu izan behar dugu", azpimarratu du Iriartek aurrera egiteko modu bakar bezala. "Gure herria ukatzen duten horiekin aliantzak eta paktuak egitea ez da bidea. Bidea da euskaldunon arteko batasuna eta elkarlana indartzea", gehitu du.
Bizkaiko ahaldun nagusi izateko EH Bilduren hautagai Bea Ilardiak beste politika mota batzuk eskatu ditu Bizkaiko Foru Aldundiaren aldetik, "gehiengoaren interesak erdigunean jartzeko, eta ez gutxiengoarenak".
"Bizkaian bizi garen pertsonen interesei erantzuten ez dieten proiektuak egiten ditu Aldundiak. Hegoaldeko Saihesbidean xahutuko dituzten 200 milioi euroak, adibidez, ea inork erabiltzen ez duen azpiegitura baterako".
"Bitartean, Busturialdea bezalako eskualdeak abandonatuta, proiekturik gabe eta gero ahaztuta geratzen diren hauteskunde promesaz beteta", esan du Ilardiak.
