Parisera eraman dituzte ETAko ustezko lau kideak

ETAko lau ustezko kideak Parisen daude eguerditik, eitb.com-ek jakin ahal izan duenez.

Ohiko prozedurari jarraituz, eta behin miaketa bukatuta, lau atxilotuak SDATen Levallois Perreteko egoitzara bidali dituzte (Parisen kanpoaldean), eta han astelehen gauera arte gera daitezke; izan ere, orduan beteko dira 96 ordu atxilotu zituztenetik.

Epe&' || 'nbsp; hori agortuta (batzuetan, agortu aurretik ere)&' || 'nbsp; terrorismoaren ardura duen Pariseko Epaitegira eramango dituzte.

Miaketa

Frantziako polizia tekniko eta zientifikoak ETAko ustezko lau kideren etxearen miaketa amaitu zuen atzo, larunbatean. Laurak ostegunean atxilotu zituzten Willencourten (Frantziako iparraldean), Alejandro Zobaran Arriola, Xarla, ETAko komandoen ustezko burua barne.

Miaketan, Poliziak ETAko talde militarraren material informatiko ugaria aurkitu du. Horri esker, irailaren 5ean iragarritako su-etenetik izandako mugimendu guztien berri izango dute segurtasun indarrek.

Atxilotuak

Barne Ministerioaren esanetan, Mikel Oroz Torrea ETAren logistika taldeko burua da. 31 urtekoa da eta eskarmentu handia dauka lehergailuen fabrikazioan eta garraioan. 1979ko apirilean jaio zen, eta duela bi urte ihes egin zuen. Kale borrokan aritu zen hasieran, eta ETAren hainbat taldetan egon eta antsietate krisi bat jasan eta gero, Frantziara alde egin zuen.

Iban Saez de Jauregi Kadizen jaio zen 1977an, eta Zobaranen eta Orozekin batera, ETAko kide bilatuenen zerrendan agertzen da.

Bere aldetik, Urko Labaka Larrea ihes eginda zegoen 2010eko ekainetik. Orduan, zita zeukan Auzitegi Nazionalean, Segiko beste 17 kiderekin batera epai zezaten, baina ez zen agertu.

Fiskalak zortzi urteko espetxe zigorra eskatu zuen harentzat, kale-erasoak egiten zituzten hainbat taldetako kide izatea egotzita.

Frantziako justizia ministroak adierazi du atzo atxilotutako ustezko ETAko kideetako batek zerikusia izan zuela Jean Serge Nerin jendarmearen hilketarekin, baina ez du argitu zein den.

Ibilgailuak lapurtzen ari zen ETAko kide talde batek hil zuen Nerin iazko martxoan eta hilketa horrengatik auziperatuta daude baita Mikel Karrera, Arkaitz Agirre-Gabiria eta Joseba Urbieta.