Politika -
Aberri Eguna
EH Bilduk eta EH Baik Iruñean eta Donibane Garazin ospatuko dute Aberri Eguna
Bi koalizio subiranistak bat datoz: "Aberri Egunaren ospakizuna eraberritu eta zabaldu egin behar da, datozen urteetan euskal herritar guztiak ekitaldi bakar batean biltzeko".
AGENTZIAK | ERREDAKZIOA
Apirilaren 21ean, EH Bilduk eta EH Baik Iruñean eta Donibane Garazin ospatuko dute Aberri Eguna, hurrenez hurren. Bi koalizio subiranistek hausnarketa bera egin dute, biek uste baitute ospakizun hori "eraberritzea eta zabaltzea" ezinbestekoa dela, euskal herritar guztiak ekimen bakarrean bildu nahi izanez gero behintzat.
Anita Lopepek (EH Bai) eta Jasone Agirrek (EH Bildu) agerraldia egin dute Donostian, Aberri Eguneko ekitaldiak aurkezteko, eta ospakizun horrek "herritar guztiak" batu behar dituela aldarrikatu dute.
Azken urteotan bi koalizioek Independentistak Sareak deitutako ekitaldiekin bat egin dute, baina mugimendu horrek aurten Aberri Eguneko ekimenik ez antolatzea erabaki duenez, euren deialdi propioa egitea pentsatu dute.
Independentistak Sarearen asmoa hasieratik izan da herritar guztiak batuko dituen ekimen bat antolatzea, baina orain arte ez da posible izan. Agirrek eta Lopepek azpimarratu dute bi koalizioek ospakizun bateratu bat lortzeko lanean jarraituko dutela aurrerantzean ere.
"Euskal Herria lurralde historiko guztiek osatzen dute, eta Aberri Eguna Euskal Herrian bizi eta lan egiten duten pertsona guztien eguna da", adierazi dute.
"Euskal Herria anitza da hizkuntzari, jatorriari eta kulturari dagokienez, eta Aberri Egunak aniztasun hori erakutsi eta nabarmendu behar du", erantsi dute.
