Politika -
Maiatzeko hauteskundeak
Gorenak ostiralean jakinaraziko die aldeei Sorturen inguruko autoa
Ordu eta erdiko bilera egin dute gaur Auzitegi Gorenaren 16 epaileek. 217 orriko autoa sinatu egin dute, eta boto partikularra aurkezteko epea ostiralean ezarri dute.
Erredakzioa
Auzitegi Gorenaren 61. artikuluko areto berezia ordu eta erdiz batzartu egin da gaur Sortu legeztatzea errefusatzen duen autoa idazteko. Ostiralean jakinaraziko die aldeei autoaren edukia.
Sortu legeztatzearen alde agertu ziren epaileek boto partikularra aurkezteko epea ostiralean ezarri dute, eguerdiko 12:00etan. Ordu bat beranduago autoaren nondik norakoak jakinaraziko dituzte.
Bozketan, aretoa osatzen duten 16 epaileetako zazpi agertu ziren alderdi abertzaleari hauteskundeetan parte hartzen uztearen alde, baina hiruk baino ez zuten iragarri boto partikularra idazteko asmoa (Manuel Alarcon, Rafael Gimeno-Bayon eta Jose Luis Calvo Cabello).
Duela astebete, Auzitegi Gorenak aintzat hartu zituen Estatuko Abokatutzaren eta Fiskaltzaren eskaerak, eta galarazi egin zuen Sortu legeztatzea, Batasunaren jarraipena dela argudiatuta.
Alberto Jorge Barreiro ez da bileran egon, baina autoa sinatu egin du. Iturri judizialen arabera, 16 epaileek autoa sinatu egin dute, baita Carlos Divar Auzitegi Goreneko presidenteak ere.
