Politika -
Maiatzaren 22ko hauteskundeak
EAk eta Alternatibak gaur erregistratuko dute Bildu, Iruñean
EAk, Alternatibak eta hainbat "independiente, soberanista eta ezkertiarrek" herenegun aurkeztu zuten Bildu; hautagaitzak larunbatean ezagutaraziko dituzte Kursaalean egingo den ekitaldi batean.
Erredakzioa
Maiatzaren 22ko hauteskundeetara aurkezteko, Bilduk apirilaren 8ra arte zuen epea koalizio moduan osatzen zela jakitera emateko, hauteskunde organoetatik azaldu dutenez. Gauzak horrela, EAk, Alternatibak eta pertsona "independente, soberanista eta ezkertiarrek" gaur eguerdian erregistratuko dute Bildu koalizioa Iruñean.
Hauteskundeetara aurkeztu nahi duten koalizioek pasatu den martxoaren 30etik apirilaren 8ra dute erregistratzeko epea; hautagaitzak, berriz, sei eguneko epean aurkeztu beharko dira, apirilaren 13tik 18ra, gainerako alderdi politikoen moduan.
Hautagaitzak apirilaren 20an argitaratuko dira eta 22an irregulartasunak edo akatsak jakitera emango zaizkie; horiek bi egunetan zuzendu beharko dira, apirilaren 23an eta 24an. Behin betiko zerrendak apirilaren 25ean jakinaraziko dira eta hurrengo egunean dagozkien buletinetan argitaratuko dira.
Errekurtsoak apirilaren 27 eta 28an egin ahal izango dira eta datozen egunetan horien ebazpena jakinaraziko da; Auzitegi Gorenera joz gero, maiatzaren 5era itxaron beharko litzateke irizpena jakiteko.
Joan den larunbatean, Eusko Alkartasunaren Batzar Nazionalak guztien adostasunarekin onartu zuen Zuzendaritza Batzordeak proposatutako moduan "subjektu elektoral" berri bat sortzea Altenatiba, Araba Bai eta independenteekin batera, datozen udal eta foru hauteskundeetarako.
Alternatibak bere aldetik, larunbatean bertan bere Batzar Nazionala bildu zuen eta maiatzaren 22ko hauteskundeetara Eusko Alkartasunarekin eta "ezkerreko soberanista independenteekin" koalizioan aurkeztea erabaki zuen, Euskal Herria Ezkerretik akordioarekin "beren konpromisoa berretsiz". Ez da "B plana izateko" aurkeztu
EAk eta Alternatibak koalizioan aurkezteko erabakiak hartu eta egun batera, igandean, Bildu koalizio berriaren lerro orokorrak aurkeztu zituzten. Larunbat honetan hautagaitzak aurkeztuko dituzte Donostiako Kursaal Jauregian egingo den ekitaldi batean.
Bilduren sustatzaileek azpimarratu dute koalizio horrek "subiranotasun aurrerakoirako" balizko instrumentua izan nahi duela; Ziurtatu dute Auzitegi Gorenak Sortu alderdi politiko moduan inskribatzea eragotzi ondoren egituratu den "B plana" edo "plan iluna". Azpimarratu dutenez, "subiranotasunak instituzioetan gizartean duen pisu bera izan dezan" sortu den eskaintza da Bildu, hauteskundeetatik "haratago doana".
